Izraılde «Ál-Jazıra» jáne «Ál-Maıadın» arnalarynyń qyzmeti toqtatyldy

ASTANA. KAZINFORM — Izraıl bıligi «Ál-Jazıra» (Qatar) jáne «Ál-Maıadın» (Lıvan) arnalaryn jabý týraly sheshim qabyldady, dep habarlaıdy Anadoly.

Izraıldiń baılanys mınıstri Shlomo Karhı amerıkandyq X áleýmettik jelisinde málimdeme jasady.

– Búginnen bastap «Ál-Jazıra» men «Ál-Maıadın» Izraılde ınternet saıttarynda, teledıdar arqyly jáne YouTube platformasynda buǵattalatyn bolady. Premer-mınıstr Bınıamın Netanıahý jáne úkimet jeksenbide «Ál-Jazıra» men «Ál-Maıadın» arnalaryn buǵattaý týraly jarlyqty bekitti, – dep jazdy ol.

Karhı sheshimniń spýtnık arqyly taratý qyzmetin toqtatý máselesiniń qorǵanys mınıstriniń quzyretine jatatynyn atap ótti. 

Haaretz gazetiniń habarlaýynsha, bul sheshim Izraılde 90 kún boıy kúshinde bolady. Osy merzimnen keıin bul sheshim qaıta uzartylýy kerek.

Basylym atap ótkendeı, bul sharalar eki jyl buryn qabyldanǵan «Ál-Jazıra týraly zańnyń» sheńberin keńeıtedi, ol zań boıynsha osy eki arnanyń Izraıl aýmaǵynda taralýyna tyıym salynǵan.

Sonymen qatar, Izraıl parlamenti ótken aıda mınıstrge tótenshe jaǵdaı jarııalanbaǵan jaǵdaıda da sheteldik BAQ-tardy jabýǵa quqyq beretin túzetýdi maquldaǵany týraly málimdeldi.

Osyǵan deıin byltyr qysta Palestına bıligi Qatardyń «Ál-Jazıra» telearnasynyń habar taratýyn toqtatqan edi.