Astanada ruqsat etilmegen úıindilerdiń 90%-dan astamy qurylys qaldyqtary — statıstıka
ASTANA. KAZINFORM — Astana qalasy ákimdiginde qala ákiminiń birinshi orynbasary Nurlan Nurkenovtiń tóraǵalyǵymen elorda qurylysshylarynyń qatysýymen keńes ótti, dep habarlaıdy elorda ákimdiginiń resmı saıty.
Jıynda ruqsat etilmegen qoqys úıindilerin azaıtý sharalary talqylandy.
Resmı derekterge sáıkes, elordadaǵy ruqsat etilmegen qoqys úıindileriniń 90%-dan astamy — qurylys qaldyqtary, olardyń 20%-y — buzylǵan ǵımarattardan qalǵan qaldyqtar. Tek 2024 jyldyń ózinde Astanada osyndaı 414 úıindi anyqtalǵan.
Problemany sheshý úshin 2025 jyldyń 13 mamyrynan bastap qalalyq máslıhat maquldaǵan qurylys qaldyqtaryn basqarý qaǵıdalary kúshine endi. Pılottyq joba aıasynda «Smart Waste» aqparattyq júıesi iske qosyldy. Bul júıe qaldyqtardyń qurylys alańynan bastap polıgonǵa deıin tolyq tsıfrlyq baqylanýyn qamtamasyz etedi.
Astana qalasynyń Qorshaǵan ortany qorǵaý jáne tabıǵatty paıdalaný basqarmasynyń basshysy Dáýlet Dosqulovtyń málimetinshe, qazirgi ýaqytta 1000-nan astam reıs jasalyp, 14 500 tonnadan astam qurylys qaldyǵy shyǵarylǵan. Barlyq nysannyń tsıfrlyq kartasy jasalǵan, bul qaldyqtardyń paıda bolý kózderin naqty ýaqyt rejıminde baqylaýǵa múmkindik beredi. Sondaı-aq, jazǵa deıin halyqqa iri kólemdi jáne jóndeý qaldyqtaryn zańdy túrde shyǵarý úshin onlaın-servısti iske qosý josparlanyp otyr.
Jańa qaǵıdalar aıasynda qurylys salýshylar men merdiger uıymdar mindetti:
• jobalyq jáne ekologııalyq qujattamaǵa sáıkes qaldyqtardyń kólemin esepke alýǵa;
• nysandarda arnaıy konteınerler qoıylǵan eko-aımaqtar uıymdastyrýǵa;
• GPS jabdyqtalǵan tirkelgen tasymaldaýshylarmen kelisimsharttar jasasýǵa;
• árbir reısti júıe arqyly tirkeýge (salmaǵy, baǵyty, polıgonǵa túsirý deregi);
• barlyq málimetti tapsyrýǵa.
Budan bólek, polıgonǵa qaldyqtar tek resmı tirkelgen nysandar men Smart Waste júıesinde jumys isteıtin tasymaldaýshylardan ǵana qabyldanady. Qaǵıdalardy buzǵan jaǵdaıda qurylysshylar men tasymaldaýshylarǵa aıyppul salynady.
— Bizdiń mindetimiz — qaldyqtardy basqarýmen ǵana shektelmeı, qurylysshylar men merdigerler arasynda turaqty ekologııalyq mádenıetti qalyptastyrý. Biz barlyq kezeńde ashyqtyq pen jaýapkershilikti qamtamasyz etýimiz kerek, — dep atap ótti qala ákiminiń birinshi orynbasary Nurlan Nurkenov.
Barlyq qaldyq kózi naqty ýaqyt rejıminde baqylaýǵa bolatyn tsıfrlyq kartada turaqty túrde belgilenip otyrady.
Buǵan deıin kóshede tóbelesken elordalyq kólik júrgizýshileri bes táýlikke qamaldy.