Izraıl jaqyn kúnderi «Rafah» shekara ótkelin ashpaq
ASTANA. KAZINFORM — Izraıl jaqyn kúnderi Gaza sektorynyń syrtqa shyǵatyn jalǵyz núktesi — «Rafah» shekara ótkelin birjaqty túrde tek Gazadan Mysyrǵa shyǵatyn baǵytta ashýdy josparlap otyr, dep habarlaıdy Anadoly.
Bul týraly Izraıl BAQ-tary Izraıl Qorǵanys mınıstrliginiń qaramaǵyndaǵy Palestına okkýpatsııalanǵan aýmaqtarynda úkimettik is-qımyldardy úılestirý departamentine (COGAT) silteme jasap habarlaıdy.
Habarlamada sheshim «atysty toqtatý kelisimine jáne saıası basshylyq nusqaýlaryna sáıkes» qabyldanǵany aıtylǵan. COGAT málimdemesine sáıkes, ótkel tek bir baǵytta — Gazadan Mysyrǵa ashylady.
Palestınalyqtardyń ótkel arqyly ótýi «Izraıldiń qaýipsizdik tekserýinen» keıin jáne Mysyr tarapymen úılestirilgen jaǵdaıda júzege asady. Ótkelde Eýropalyq odaqtyń shekarada kómek kórsetý mıssııasy (EUBAM) qyzmetin jalǵastyrady.
Resmı habarlamada palestınalyqtardyń osy ótkel arqyly Gaza sektoryna qaıtyp ótý múmkindigi týraly eshteńe aıtylmaǵan.
10 qazanda Izraıl men HAMAS qozǵalysy arasynda jasalǵan atysty toqtatý kelisimine sáıkes, Izraıl áskeri Rafah aýdanyn, sonyń ishinde «Sary syzyq» dep atalatyn jáne shekara ótkelin qamtıtyn aımaqty baqylaýda ustaıdy.
Sol kelisim boıynsha «Rafah» ótkeli tutqyndar men qamalǵandardy almastyrý aıaqtalǵannan keıin, ıaǵnı 13 qazannan keıin dereý ashylýy kerek edi. Alaıda Izraıl bir jarym aı boıy ártúrli syltaýlarmen bul talapty oryndaýdan bas tartyp, shekarany ashýdy keıinge qaldyrdy.
Budan buryn Izraıl men HAMAS atysty toqtatý kelisimi aıasynda tutqyn almasqany anyqtaldy.
Qarashanyń basynda Izraıl Gaza sektorynda atysty toqtatý rejımin taǵy da buzdy. Izraıldiń Han-ıÝnýs qalasyna jasaǵan soqqysynyń saldarynan adamdar jaralandy.
Budan buryn HAMAS delegatsııasy Kaırde Gazadaǵy atysty toqtatýdy júzege asyrý boıynsha kelissóz ótkizgenin jazǵanbyz.
Aıta keteıik, Qatar memleketi Gaza sektoryndaǵy atysty toqtatýdy qamtamasyz etý úshin kúsh salýdy jalǵastyryp keledi. Qatar oq atýdy toqtatý rejımi saqtalsa, kelisimniń ekinshi kezeńine kóshýge múmkindik bar úmittenedi. Bul týraly Qatar Syrtqy ister mınıstrliginiń ókili Madjed ál-Ansarı málim etti.