Izraıl zańsyz ustaǵan «Bostandyq flotılııasynyń» 45 belsendisi bosatyldy

ASTANA. KAZINFORM – Gaza sektoryna gýmanıtarlyq kómek alyp bara jatqanda Izraıl kúshteri halyqaralyq sýlarda zańsyz ustaǵan «Bostandyq flotılııasy» koalıtsııasynyń 45 belsendisi Iordanııaǵa bardy, dep habarlaıdy Anadoly.

-«Bostandyq flotılııasynyń» bortynda bolǵan baýyrlas jáne dostas elderdiń 45 belsendisi okkýpatsııalanǵan batys jaǵalaý men Iordanııany jalǵap jatqan korol Hýseın kópiri arqyly el aýmaǵyna jetti, - dep habarlady Iordanııa Syrtqy ister mınıstrliginiń baspasóz qyzmeti.

Sondaı-aq habarlamada evakýatsııalanǵandar Týnıs, Ispanııa, Belgııa, Frantsııa, Germanııa, Italııa, Irlandııa, Fınlıandııa jáne AQSh pen Kanada azamattary ekeni aıtylǵan.

«Bostandyq flotılııasy» koalıtsııasy

Italııadan shyqqan «Bostandyq flotılııasy» (Freedom Flotilla Coalition) Mysyr jaǵalaýyna bet alyp, Gaza sektoryna gýmanıtarlyq kómek jetkizýdi jáne Izraıldiń teńiz blokadasyn buzýdy maqsat etken. Flotılııa quramynda bir keme men segiz qaıyq bolǵan, olardyń bortynda 30 elden 140-tan astam adam dárigerler jáne BAQ ókilderi bolǵan.

8 qazan kúni tańerteń Izraıl armııasy halyqaralyq sýlarda, Gaza sektorynan shamamen 120 teńiz mıl qashyqtyqta flotılııaǵa shabýyl jasap, onyń barlyq jolaýshylaryn zańsyz túrde ustady.

Buǵan deıin, 1 qazan kúni keshke Izraıl áskeri halyqaralyq Global Sumud flotılııasyna da shabýyl jasap, onyń jolaýshylaryn ustap alǵan bolatyn.

Osyǵan deıin Izraıldiń áskerı kemeleri Gaza sektoryna bet alǵan flotılııany toqtatqany týraly jazdyq.