Izraıl Iemenniń Hodeıda portyna soqqy berdi
ASTANA.KAZINFORM — Izraıl armııasy Hodeıda porty aımaǵyndaǵy ınfraqurylymǵa zymyran shabýylyn jasaǵanyn rastady, dep habarlaıdy Kazinform agenttiginiń tilshisi.
Izraıl Iemendegi Hodeıda portyna soqqy berip, teńiz jáne áýe blokadasyna qaýip tóndirdi Izraıl áskerı-teńiz kúshteri seısenbi kúni Iemenniń batys jaǵalaýyndaǵy hýsıtter baqylaýyndaǵy Hodeıda portyna soqqy berdi. Bul týraly Izraıl qorǵanys kúshteriniń málimdemesinde habarlandy.
— Shabýyldyń maqsaty — «terrorıster» operatsııa úshin paıdalanýdy jalǵastyryp jatqan porttyń áskerı áleýetine odan ári zııan keltirý. Bul «azamattyq ınfraqurylymdy lańkestik maqsatta aqymaqtyqpen paıdalanýdyń» taǵy bir mysaly, — dedi TsAHAL.
Bir kún buryn Izraıl armııasy hýsıtter baqylaıtyn úsh negizgi portty: Hodeıda, Ras Isa jáne Salıfti evakýatsııalaý qajettigi týraly eskertý jasady.
Iemendik hýsıtterge jaqyn Al Masirah telearnasynyń habarlaýynsha, Izraıl zymyrandary port aılaqtaryna tıgen. Zardap shekkender týraly málimet joq. Soqqy teńizden jasaldy, ızraıldik BAQ-tyń habarlaýynsha, bul Iemendegi topqa qarsy naýqan bastalǵaly bergi alǵashqy oqıǵa boldy.
Izraıl qorǵanys mınıstri Israel Kats soqqynyń bolǵanyn rastap, eger el aýmaǵyna shabýyldar jalǵasa berse, kúsheıe túsemiz dep qorqytty.
— Men Izraıl Áskerı-teńiz kúshterin Iemendegi Hodeıda portyna sátti soqqy berýimen quttyqtaımyn. Izraıldiń uzyn qoly aýada da, teńizde de kez kelgen jerge jetedi. Biz «hýsıttik lańkestik uıymǵa» eskerttik: eger olar Izraıldi atqylaýdy jalǵastyrsa, olar odan kúshti jaýap alady jáne teńiz jáne áýe blokadasynyń astynda qalady, — dedi ol X áleýmettik jelisinde.
2023 jyldyń qazan aıynda Gaza sektoryndaǵy soǵys bastalǵannan beri Iemenniń hýsıtteri palestınalyqtarmen yntymaqtasa áreket etip jatyr dep, Izraıl aýmaǵyna birneshe ret zymyran men dron ushyrdy jáne Qyzyl teńizdegi halyqaralyq kemelerge shabýyl jasady.
Aıta ketelik Izraıl áýe kúshteri Sırııaǵa shabýyl jasaǵan edi.