Izraıl Iemendegi hýsıtterdiń mańyzdy nysandaryna soqqy jasady
ASTANA. KAZINFORM – El astanasy Sana men Qyzyl teńiz jaǵalaýlaryn qosa alǵanda Iemenniń soltústik-batys óńiriniń basym bóligin baqylaýynda ustap otyrǵan hýsıtter Izraıl jaǵyna turaqty túrde zymyrandar men ushqyshsyz ushatyn apparattar jiberip otyrady.
Bul týraly Euronews habarlady.
TsAHAL áýeden jasaǵan soqylarynyń saldarynan Iemen astanasy Sanada keminde 35 adam qaza bolyp, 130 adam jaraqat aldy. Sonymen qatar Iemenniń Ulttyq mýzeıi men ózge de tarıhı nysandary búlindi. Bul týraly «Ansar Allah» qozǵalysynyń baskóterýshi hýsıtteri málimdegen.
Izraıl Qorǵanys armııasynyń (TsAHAL) habarlaýynsha, áýe shabýyly Iemenniń astanasy Sana men soltústiktegi Ál-Djaýf provıntsııasynda ornalasqan hýsıtterdiń negizgi áskerı nysandaryna baǵyttalǵan. Operatsııaǵa 10-nan astam joıǵysh ushaq qatysyp, olar 15 nysanǵa 30-dan astam oq-dári qoldanǵan.
Izraıldiń qorǵanys mınıstri Israel Katstyń aıtýynsha, soqqy nátıjesinde hýsıt sodyrlary shoǵyrlanǵan birneshe lager joıylǵan.
Bul operatsııa osy aptada Izraıl áýejaıy Ramonǵa jiberilgen drondarǵa jáne evreı memleketiniń aýmaǵyna atylǵan zymyrandarǵa berilgen jaýap bolǵan.
2023 jyly HAMAS Izraılge shabýyl jasap, odan keıin Gaza sektorynda soǵys bastalǵannan keıin, hýsıtter Izraıl aýmaǵyn atqylaıtynyn jáne onymen baılanysty kemelerdiń Qyzyl teńiz ben Bab-el-Mandeb buǵazy arqyly ótýine jol bermeıtinin málimdegen edi.
2025 jyldyń qańtar aıynda Gaza sektorynda atysty toqtatý rejımi engizilgennen keıin shabýyldar biraz ýaqytqa toqtaǵan. Alaıda naýryz aıynyń basynda bitim buzylyp, hýsıtter Qyzyl teńizdegi Izraıl kemelerine qaıtadan soqqy jasaı bastady, keıin Izraıl aýmaǵyndaǵy nysandarǵa da shabýyl jasaýǵa kóshken.
Osyǵan deıin hýsıtterdiń Izraılmen baılanysy bar kemelerge shabýyl jasaýǵa ýáde bergeni týraly jazdyq.