Izraıl Iemen astanasyna qaıtadan áýe shabýylyn jasady
ASTANA. KAZINFORM — Izraıldiń áskerı ushaqtary jeksenbi kúni Iemen astanasy Sana qalasyndaǵy úkimettik jáne áskerı nysandarǵa birqatar áýe soqqysyn jasady, dep jazdy Sınhýa agenttigi.
«Al-Masıra» telearnasynyń málimetinshe, jergilikti turǵyndar áýe shabýyldary prezıdent saraıy, astanalyq hatshylyq ǵımaraty, memlekettik munaı kompanııasynyń ǵımaraty, janarmaı qoımalary men elektr stantsııalary ornalasqan qalanyń ortalyq, ońtústik jáne ońtústik-batys bólikterinde bolǵanyn habarlaǵan.
Sondaı-aq, birneshe nysanda ondaǵan jarylys pen órt shyqqany, oqıǵa oryndaryna jedel járdem kólikteri jetkeni týraly aıtyldy. Medıtsına qyzmetkerleri qurbandar baryn málimdedi, alaıda resmı derekter ázirge jarııalanǵan joq.
Izraıldiń qorǵanys mınıstri Israel Kats shabýyl jasalǵanyn rastady, biraq egjeı-tegjeıin ashpady. Izraıldiń áskerı radıosy áýe shabýyldarynyń aıaqtalǵanyn, maqsat retinde elektr stantsııalary, prezıdent saraıy men janarmaı qoımasy tańdalǵanyn habarlady.
Aıta keteıik, buǵan deıin Izraıl Iemenniń Hodeıda portyna soqqy bergen edi.