Izraıl Ulybrıtanııa, Aýstralııa jáne Kanadanyń Palestına memleketin moıyndaǵanyn aıyptady

ASTANA. KAZINFORM — Izraıl premer-mınıstri Bınıamın Netanıahý jeksenbi kúni Ulybrıtanııa, Kanada jáne Avstralııanyń Palestına memleketin moıyndaý sheshimin synady, dep habarlaıdy Sınhýa.

— Men 7 qazandaǵy qorqynyshty qyrǵynnan keıin Palestına memleketin moıyndaǵan kóshbasshylarǵa naqty aıtarym bar. Siz terrorızmge úlken marapat berip otyrsyz, — dedi B. Netanıahý, 2023 jylǵy qazanda palestınalyq qozǵalys HAMAS-tyń Izraıldiń ońtústik aımaqtaryna jasaǵan shabýyldy eske salyp. 

Izraıl premer-mınıstri «Iordan ózeniniń batysynda eshqandaı Palestına memleketi bolmaıdy» dep málimdedi.

Bınıamın Netanıahý jaqynda Palestına memleketin moıyndaý týraly sheshimge AQSh-tan qaıtqannan keıin jaýap beretinin aıtty.

— Kútińizder, — dep qysqa qaıyrdy ol.

Palestına prezıdenti Mahmýd Abbas úsh eldiń bul qadamyn qoldap, ony «halyqaralyq zańǵa sáıkes ádiletti jáne turaqty beıbitshilikke jetýdiń mańyzdy ári qajetti qadamy» dep atady, dep habarlaıdy onyń ákimshiligi.

Budan buryn habarlanǵandaı, Kanada, Aýstralııa jáne Ulybrıtanııa Palestına memleketin moıyndaıtynyn jarııalady. Kanada Palestınany resmı túrde moıyndaǵan G7 elderiniń birinshisi boldy.

Bul rette brıtanııalyqtardyń 90 paıyzy Londonnyń Palestınany moıyndaý týraly bastamasyn qoldamaıtynyn jazǵan edik.