Izraıl túrmesinde 45 jyl otyrǵan palestınalyq bostandyqqa shyǵýy múmkin

ASTANA. KAZINFORM – Izraıl túrmesindegi «Palestınalyq tutqyndardyń jetekshisi» laqap atymen belgili Naıl ál-Bergýsı 45 jyldyq qamaýdan keıin bosatylady, dep habarlaıdy TRT aqparattyq agenttigi.

Túrkııa Radıo Televızııa portalynyń jazýynsha, Naıl ál-Bergýsı Izraıl túrmesinde 45 jyldan astam ýaqytyn ótkizgen álemdegi eń uzaq merzimdi saıası tutqyn retinde Gınnestiń rekordtar kitabyna engen. Ol ómiriniń jartysynan kóbin Izraıl túrmelerinde ótkizgendikten «Palestınalyq tutqyndardyń kóshbasshysy» degen laqap atqa ıe boldy.

— Ol «Palestınadan shyǵyp ketý» shartymen bosatylmaq. Buǵan deıin Naıl jer aýdarylýdan bas tartqan bolatyn, biraq dúısenbiden bastap bul sheshimdi qabyldaýǵa májbúr boldy. Alaıda onyń naqty qaı elge jiberiletini áli belgisiz, - dep málimdedi Naıl ál-Bergýsıdiń áıeli Iman Nafı.

Naıd ál-Bergýsı alǵash ret 1978 jyly 19 jasynda túrmege toǵytylǵan jáne Izraıl men Hamas arasyndaǵy tutqyn almasý kelisimi boıynsha 2011 jyly ǵana bosatylǵan. Artynsha ol birneshe ret ustaldy, biraq biraz ýaqyttan keıin qaıtadan bosatyldy.

Palestınalyq sońǵy ret 2014 jyly 20 maýsymda úsh evreı qonystanýshyny óltirýge qatysy bar degen aıyppen ustaldy. 2017 jyly 22 aqpanda Izraıl soty ony 18 jylǵa bas bostandyǵynan aıyrdy.

Aıta keteıik, Izraıl premer-mınıstri Benıamın Netanıahý qańtar aıynda bitim men tutqyn almasý jónindegi málimdemesinde bosatylatyn palestınalyqtardyń elden shyǵarylatynyn aıtqan bolatyn.

Eske salsaq, buǵan deıin HAMAS beısenbi kúni taraptar arasyndaǵy kelisim aıasynda palestınalyq tutqyndarǵa aıyrbas retinde kepilge alynǵan tórt adamnyń máıitin Izraılge beretinin jazǵan edik.