Izraıl Tramptyń Gazadaǵy atysty toqtatý týraly bastamasymen kelisetinin málimdedi
ASTANA. KAZINFORM — Kelissóz týraly Izraıl SІM basshysynyń Býdapeshtke sapary aıasynda aıtyldy, dep habarlaıdy Kazinform agenttiginiń menshikti tilshisi.
Izraıl Syrtqy ister mınıstri Gıdeon Saar 8 qyrkúıekte Tel-Avıv AQSh prezıdenti Donald Tramptyń Gaza kelisimi týraly usynysyn qabyldaǵanyn aıtty.
Saardyń aıtýynsha, Izraıl soǵysty aıaqtaıtyn jáne kepilge alynǵan adamdardy bosatýdy jáne HAMAS-ty qarýsyzdandyrýdy kózdeıtin «tolyq kelisimge» daıyn: málimdeme Býdapeshttegi baspasóz máslıhatynda aıtyldy.
Bir kún buryn AQSh prezıdenti Izraıldiń ózi qoıǵan sharttarǵa keliskenin málimdegen.
— Izraıl meniń sharttarymdy qabyldady. HAMAS-tyń da solaı jasaıtyn ýaqyty keldi. Bul — meniń sońǵy eskertýim, - dep jazdy Donald Tramp.
Ol kelisimdi «jaqynda» jarııalaıdy dep úmittenetinin aıtty.
"This is my last warning, there will not be another one!" - President Donald J. Trump pic.twitter.com/WxDMiFQOkB
— The White House (@WhiteHouse) September 7, 2025
Izraıl qorǵanys mınıstri Izraıl Katts málimdeme jasady.
— Bul meniń Gazadaǵy jáne sheteldegi qonaqúılerdegi HAMAS sodyrlaryna sońǵy eskertýim: kepilge alynǵandardy bosatyp, qarý-jaraqtaryńyzdy tapsyryńyzdar, áıtpese bul aımaq joıylady, siz de joıylasyz, - dedi ol.
Ol Gazada baqylaý ornatý operatsııalaryn keńeıtýdegi daıyndyq barysyn atap ótti.
Izraıl qalaǵa shabýyldyń bastalǵanyn resmı túrde jarııalaǵan joq. Biraq sońǵy kúnderi kópqabatty úılerge soqqy berip, olardy HAMAS áskerı maqsatta qoldanady dep málimdedi.
Gaza sektoryndaǵy azamattyq qorǵanys qyzmetiniń málimeti boıynsha, jeksenbide kem degende 48 adam qaza tapty, taǵy 10 adam Gaza qalasynyń aınalasyndaǵy túngi soqqylardan kóz jumdy.
«Sońǵy eskertý» aıasynda HAMAS «dereý kelissózder ústeline otyrýǵa» daıyn ekenin málimdedi. Bul kelisimdi soǵystyń aıaqtalǵany týraly naqty habarlandyrýmen, Izraıl kúshterin sektordan tolyq shyǵarýmen jáne táýelsiz mamandardan ýaqytsha Palestına ákimshiliginiń qurylýymen baılanystyrdy.
Izraıl armııasy Gaza sektorynda qalǵan kepilge alynǵan adamdardyń sanyn 47 dep eseptep otyr, olardyń 25-i qaıtys bolǵan. HAMAS kezeń-kezeńimen bosatýdy jáne keńirek saıası jaǵdaılardy talap etedi. Buǵan deıin Palestına qozǵalysy 60 kúndik bitimgershilikke kezeń-kezeńimen kelisken.
Izraıl Gaza sektoryna shabýyldy kúsheıtip, kóship-qonǵannan ábden qajyǵan halyqty qonystaryn tastap ketýge májbúrlep otyr. Bul týraly BUU Bas hatshysynyń ókili Stefan Dıýjarrık aptalyq brıfıng barysynda málim etti.