Izraıl Tramp maquldaǵan amerıkalyq aýyr bombalar partııasyn aldy
ASTANA. KAZINFORM – Izraıl AQSh prezıdenti Donald Tramp MK-84 bombalaryn eksporttaýǵa salynǵan tyıymdy alyp tastaǵannan keıin atalǵan oq-dárige qol jetkizdi. Bul bombany eksporttaýǵa AQSh-tyń buǵan deıingi prezıdenti Djo Baıden ákimshiligi tyıym salǵan bolatyn, dep habarlaıdy Kazinform agenttigi Amerıka daýysyna silteme jasap.
Jeksenbi kúni jýrnalıster aldynda sóz sóılegen Tramp soǵysty toqtatý týraly kelisimge qol jetkizilgenine qaramastan Baıden engizgen bombany jetkizýge tyıymdy joıǵanyn málimdedi. Óıtkeni «kúshtiń kómegimen beıbitshilik» qaǵıdaty ustanylady.
- Olar bul oq-dárige Baıden ákimshiligi kezinde tapsyrys bergen edi. Biraq, Baıden bul qarýdy jetkizgen joq. Men buǵan basqasha qaraımyn. Men «kúshtik kómegimen beıbitshilik» dep aıtamyn, - dep málimdedi Tramp.
MK-84 – bul salmaǵy 907 keli bolatyn basqarylmaıtyn ushaqtan tastalatyn bomba. Ol qalyń beton men temir qabatyn tesip ótip, aýqymdy aýmaqty talqandaýǵa qaýqarly.
Baıden ákimshiligi Izraılge bul oq-dárini eksporttaýdan bas tartqan edi. Oǵan Gaza sektorynyń halqy qalyń aýdandarynda atalǵan bombany qoldaný qaýpi sebep bolǵan-dy.
- Tramp ákimshiligi tyıymdy alyp tastaǵannan keıin búgin keshke Izraılge jetkizilgen oq-dári Izraıl áskerı-áýe kúshteri men armııasy úshin mańyzdy strategııalyq resýrs sanalady. sonymen qatar Izraıl men AQSh arasyndaǵy myzǵymas odaqtastyqty dáleldeıdi, - dep málimdedi Izraıl qorǵanys mınıstri Israel Kats senbi kúni.
Buǵan deıin Izraıl premer-mınıstri Bınıamın Netanıahý AQSh prezıdenti Donald Tramptyń Taıaý Shyǵys jónindegi arnaıy ókili Stıven Ýıtkoffqa 17 aqpanda Izraıldiń áskerı-saıası kabınetin shaqyryp, tutqyndardy bosatý jáne Gaza sektorynda atysty toqtatý jónindegi kelisimniń ekinshi kezeńin talqylaıtynyn málimdegenin jazǵan edik.