Izraıl Tegeranǵa aýqymdy soqqylar bastalǵanyn málimdedi

ASTANA. KAZINFORM — Izraıldiń Qorǵanys armııasy Iran astanasy Tegeranda «ırandyq rejımniń ınfraqurylymyna» qarsy aýqymdy soqqylar bastalǵanyn málimdedi, dep jazady VVS.

Izraıl áskerı kúshteriniń málimdeýinshe, Tegerandaǵy «ırandyq terrorıstik rejımniń ınfraqurylymyna» qarsy keń kólemdi soqqylar tolqyny bastalǵan. Ázirge áskerı vedomstvo qosymsha málimet bermedi.

Sonymen qatar Irannyń memlekettik telearnasy el astanasynda jarylystar bolǵanyn habarlady.

Izraıl Qorǵanys armııasynyń Bas shtabynyń bastyǵy Eıal Zamır Izraıldiń Iranǵa qarsy operatsııasynyń kelesi kezeńine ótkenin aıtty.

Buǵan deıin Eýropalyq odaq pen Parsy shyǵanaǵy elderi Irannyń shabýyldaryn aıyptap, jaǵdaıdy ýshyqtyrmaýǵa jáne shıelenisti azaıtýǵa shaqyrǵan bolatyn.

Eske sala keteıik, 28 aqpanda Izraıl AQSh-tyń qoldaýymen Iranǵa qarsy áskerı operatsııa bastap, Taıaý Shyǵystaǵy qaqtyǵystyń jańa kezeńin ashqan edi.