Izraıl tarapy Qazaqstannan kelgen árbir adam úshin týrıstik operatorǵa 45 eýro bermek

ASTANA. QazAqparat - Izraıldiń týrızm mınıstrligi tanymal Eılat kýrortyna keletin árbir týrıst úshin 45 eýro kóleminde qazaqstandyq týrıstik operatorlardy sýbsıdııalaý baǵdarlamasyn iske asyrýǵa kiristi. Bul týraly búgin Astanada ótken baspasóz máslıhatynda Qazaqstan Respýblıkasynyń Izraıl memleketindegi Elshisi Dýlat Qýanyshev málim etti.

Atap aıtqanda, Izraıl tarapy Reseı men Qazaqstannan týrısterdi kóptep tartýǵa úmittenip otyr. ıAǵnı, bul el ózderiniń demalys oryndaryn Mysyr men Túrkııanyń kýrorttaryna balama retinde usynýda.

Elshiniń sózine qaraǵanda, 2015 jyly Izraıl azamattary Qazaqstanǵa kirý baǵytynda 4500 vıza alǵan kórinedi. Al Izraıl tarapy Qazaqstan azamattary úshin 8000 vıza shamasynda berdi.

Aıta keteıik, Izraıldiń týrızm mınıstrliginiń derekteri boıynsha 2015 jyly bul elge 2,9 mln. astam  týrıst kelgen, bul 2014 jylǵy kórsetkishten 5 paıyzǵa artyq. Osy rette Izraılge AQSh azamattary kóbirek saparlaǵan, ıaǵnı 586 myń adam bardy, Frantsııadan - 277 myń meıman saparlady. Budan keıingi orynda Germanııa, Ulybrıtanııa jáne Ýkraına tur.