Izraıl soqqylarynan Gazada bir táýlikte 78 adam qaza tapty

Izraıl armııasynyń Gaza sektoryna jasaǵan soqqylary saldarynan bir táýlikte 78 palestındik kóz jumdy, dep habarlaıdy TASS.

Katarlyq Al Jazeera telearnasynyń habarlaýynsha, Izraıl áskeri Palestına anklavyn bombalaýdy jalǵastyryp, sońǵy 24 saǵat ishinde keminde 78 adamdy mert qylǵan.

Al Jazeera telearnasy sońǵy birneshe apta ishinde Gaza sektorynda azyq-túlik kómegin alýǵa tyrysqan palestındikterdiń arasynan 700-den astam adamnyń qaza tapqanyn da atap ótti. Gaza densaýlyq saqtaý mınıstrliginiń dereginshe, Izraıl bıligi AQSh-tyń qatysýymen qurǵan Gýmanıtarlyq kómek qory (GHF) arqyly kómek taratylatyn pýnkterde 743 turǵyn qaza taýyp, 4,8 myńnan astamy jaraqat alǵan.

Mınıstrliktiń málimeti boıynsha, Izraıl men Gaza arasyndaǵy soǵys bastalǵaly beri 57 300-den astam adam mert bolyp, 136 myńǵa jýyq adam jaraqat alǵan.

Aıta ketelik Izraıl Gaza sektorynyń soltústigindegi turǵyndardy evakýatsııalaýǵa shaqyrǵan edi.