Izraıl soqqycynan Islam revolıýtsııasy Qamqorshylar korpýsynyń barlaý basshysy men orynbasary qaza tapty
ASTANA. KAZINFORM - Izraıldiń soqqysynan Islam revolıýtsııasy Qamqorshylar korpýsynyń barlaý basshysy men onyń orynbasary kóz jumdy, dep habarlaıdy VVS.
— Izraıldiń jeksenbidegi Tegeranǵa shabýyly kezinde Islam revolıýtsııasy kúzetshiler korpýsynyń barlaý uıymynyń basshysy, general Mohammad Kazemı, onyń orynbasary jáne taǵy bir general qaza tapty, - dep habarlaıdy ırandyq aqparat agenttigi «Tasnım».
Buǵan deıin Kazemı men onyń orynbasarynyń ólimi týraly Izraıl premer-mınıstri Bınıamın Netanıahý Fox News arnasyna bergen suhbatynda aıtqan bolatyn.
Buqaralyq aqparat quraldarynyń habarlaýynsha, Izraıl áskerı kúshteri Tegerandaǵy KSIR barlaý uıymynyń ǵımaratyna soqqy bergen.
Eske salaıyq, 13 maýsymǵa qaraǵan túni Izraıl Iran aýmaǵyna jappaı soqqy jasaǵan. Oǵan jaýap retinde Tegeran júzden astam drondy Izraıl baǵytyna ushyrǵan. Iran Natanzdaǵy ıadrolyq nysannyń zaqymdanǵanyn rastady, alaıda radıatsııanyń taralýyn joqqa shyǵardy.
BUU-daǵy Iran ókili Izraıldiń áýe soqqylary saldarynan 78 adamnyń qaza tapqanyn, taǵy 320-dan astam adamnyń jaraqat alǵanyn málimdedi. Qaza bolǵandar qatarynda Irannyń joǵary áskerı basshylyǵy men jetekshi ǵalymdar bar.
Sondaı-aq Izraıldiń shabýylynan keıin Iran Ormýz buǵazyn jabý múmkindigin qarastyryp jatqanyn Iran parlamentiniń ulttyq qaýipsizdik jáne syrtqy saıasat jónindegi komıtet múshesi Esmaıl Kosarı habarlady.
Iran men AQSh arasyndaǵy kelissózderge araǵaıyndyq jasap júrgen Oman Syrtqy ister mınıstri Badr ál-Býsaıdı Maskatta jeksenbi kúni ótýi tıis kezdesýdiń ótpeıtinin rastady.
Iran Prezıdenti Emmanýel Makronmen sóılesý kezinde Izraıl shabýyldaryn toqtatpaıynsha AQSh-pen eshqandaı kelissóz júrgizilmeıtinin málimdedi.
Axios málimetinshe, Izraıl AQSh-ty Iranmen soǵysýǵa shaqyrady.