Izraıl SІM ókili Qazaqstannyń Palestına halqyna 1 mln dollar kómek jiberýine pikir bildirdi
Izraıl Syrtqy ister mınıstrligi Eýrazııa jáne Balqan máseleleri jónindegi bas dırektorynyń orynbasary Sımona Galperın Astanadaǵy bırıfıngide Qazaqstannyń Palestına halqyna 1 mln dollar kómek jiberýi týraly pikir bildirdi, dep habarlaıdy Kazinform.
«Izraıl palestındikterge kómek kórsetilýine qarsy emes. Bul brıfıngiden myna mańyzdy málimetti alyp shyqqandaryńyz mańyzdy. Izarıl HAMAS-pen soǵysyp jatyr, palestındiktermen soǵysyp jatqan joq. Izraıldiń aıtyp otyrǵany jalǵyz nárse. Kómek palestındikterge jetý kerek. HAMAS-qa, terrorızmge baǵyttalmaýy kerek. Kómek palestındikterdiń ómirin qurýǵa, aýrýhanalarǵa, mektepterge, balabaqshalarǵa, ekonomıkaǵa jumsalý kerek», - dedi Izraıl ókili.
Onyń sózinshe, buǵan deıin palestındikterge joldanǵan halyqaralyq gýmanıtarlyq kómek dittegen jerge jetpeı kelgen.
«Ókinishke qaraı, keıingi ondaǵan jylda palestındikter BUU sııaqty túrli uıymdardan kez kelgen ózge halyqtan artyq kómek aldy. Biraq ol kómek qaıda? Ol kómek sýmen qamtamasyz etý júıesin quryp, ındýstrııany, ekonomıkany damytýdyń ornyna, aýrýhanalar men mektepter salýdyń ornyna HAMAS tıýnnelderine, jer astyna jumsaldy.
Sondyqtan biz palestındikterge kómek kórsetýge eshqandaı qarsy emespiz. Biraq ol kómek Gazanyń ońtústigindegi palestındikterge baǵyttalýy kerek. Óıtkeni soltústigine baǵyttalǵan kómek HAMAS-tyń oljasyna aınalyp jatyr. Tipti BUU alǵashqy lekpen jóneltken kómektiń bir bóligi shabýylǵa ushyraǵanyn moıyndady», - dedi Sımona Galperın.
Syrtqy ister mınıstrliginiń málimeti boıynsha, Gaza sektorynda qazir Qazaqstannyń 76 azamaty bar.
«Bizdiń derekterimiz boıynsha Gaza sektorynda Qazaqstan Respýblıkasynyń 76 azamaty bar. Otbasy múshelerimen qosa eseptegende olardyń sany – 161. Sonymen qatar sheteldik azamattardyń shyǵýyna baılanysty Mysyr jáne Izraıl tarapynan belgili talaptar bar. Olardyń úshten biri evakýatsııalaýǵa kelmeıdi. Olar kámeletke tolǵandar, erli-zaıyptylar», - dedi mınıstrliktiń resmı ókili Aıbek Smadııarov mınıstrlikte ótken baspasóz máslıhatynda.
Eske salsaq, Gaza sektoryndaǵy palestınalyq radıkaldar Izraıl aýmaǵyna zymyran atqylap, Izraıldiń ortalyǵy men ońtústiginde erekshe jaǵdaı engizilgen edi.
Sońǵy málimetter boıynsha, Izraıl áskeri Gazany tolyǵymen qorshap, ekige bólip tastaǵan.
