Izraıl shabýylynan keıin Iranda ınternet shekteldi

ASTANA. KAZINFORM —  Izraıldiń Iranǵa jasaǵan áýe shabýyldarynan keıin elde tótenshe jaǵdaıǵa baılanysty ınternetke qol jetkizý shekteldi. Bul týraly Irannyń Baılanys mınıstrligi málimdedi.

Mınıstrlik málimdemesinde qazirgi ahýalǵa baılanysty ýaqytsha shekteýler engizilgeni aıtylyp, jaǵdaı turaqtalǵannan keıin ınternet qaıta qosylatyny habarlandy.

Izraıl tańǵy ýaqytta Irannyń astanasy Tegerandy jáne Tebrız, Natanz (Isfahandaǵy ıadrolyq nysan), Lýrestan, Kermanshah, Shıraz, Hýzestan jáne Kým qalalaryn zymyranmen atqylady.

Qolda bar málimetke sáıkes, Natanzdaǵy ıadrolyq nysanǵa zııan kelmegen.

Shabýyl saldarynan Iran Qarýly kúshteri Bas shtabynyń bastyǵy general Mohammad Bagerı, Islam revolıýtsııasy saqshylar korpýsynyń (KSIR) bas qolbasshysy general Hýseın Salamı, «Hatem al-Anbııa» ortalyq shtabynyń qolbasshysy general Golamalı Rashıd, KSIR-diń áýe-ǵarysh kúshteriniń qolbasshysy brıgadalyq general Emır Alı Hadjızade jáne alty ıadrolyq jetekshi ǵalym qaza tapty.

Sondaı-aq Tegeranda turǵyn úılerge jasalǵan soqqydan kóptegen beıbit turǵyn, sonyń ishinde áıelder men balalardyń opat bolǵany habarlandy.