Izraıl shabýyldary saldarynan Gazada bir táýlikte 110 palestınalyq qaza tapty
ASTANA. KAZINFORM — Izraıl armııasynyń Gaza sektoryna jasaǵan soqqylary nátıjesinde sońǵy táýlikte 110 palestınalyq mert boldy, dep habarlaıdy TASS.
Katarlyq Al Jazeera telearnasynyń málimetinshe, qaza tapqandardyń ishinde Rafah qalasynyń ońtústiginde ornalasqan Gazaǵa gýmanıtarlyq kómek kórsetý qorynyń (GHF) taratý pýnkti mańynda azyq-túlik kútip turǵan 34 beıbit turǵyn da bar.
Telearna Gaza sektoryndaǵy densaýlyq saqtaý mınıstrliginiń derekterin de keltiredi: mamyr aıynyń sońynda GHF jumysyn bastaǵannan beri osy uıym nysandarynda 800-den astam palestınalyq qaza taýyp, shamamen 5 myń adam jaralanǵan.
Aıta keteıik, 18 mamyrda Izraıl armııasy Gaza sektorynyń soltústigi men ońtústiginde «Gıdeonnyń kúımeleri» atty aýqymdy qurlyq operatsııasynyń bastalǵanyn habarlady. Áskerı qımyldardyń negizgi maqsaty – HAMAS qozǵalysyn tolyq joıý jáne anklavta kepilge alynǵan barlyq ızraıldikterdi bosatý. Izraıl Premer-mınıstri Bınıamın Netanıahýdyń málimdeýinshe, operatsııa nátıjesinde armııa Gaza sektorynyń búkil aýmaǵyn baqylaýǵa alýdy josparlap otyr.
Buǵan deıin palestınalyq radıkaldy HAMAS qozǵalysy Izraıl men AQSh basqaratyn GHF qoryn beıbit turǵyndardyń qazasy úshin aıyptap, ony taratýdy talap etken bolatyn.