Izraıl salǵan qyrǵyn: Gaza sektorynda qaza tapqandar sany 69 756-ǵa jetti
ASTANA. KAZINFORM — Sońǵy 48 saǵat ishinde Izraıl armııasynyń Gaza sektoryna jasaǵan shabýyldary saldarynan qaza tapqandar sany 23 adamǵa artyp, jalpy alǵanda 69 756-ǵa jetti. Bul týraly Gaza Densaýlyq saqtaý mınıstrliginiń málimetinde aıtyldy, dep habarlaıdy Anadolý.
Sońǵy bir táýlikte Izraıl shabýyldary saldarynan 23 palestınalyq qaza taýyp, taǵy 83 adam jaraqat alǵan.
Atysty toqtatý týraly kelisim kúshine engen sátten beri 339 adam qaza taýyp, 871 adam jaralanǵan, sondaı-aq qırandylar astynan 574 máıit shyǵarylǵan.
2023 jyldyń qazan aıynan beri Izraıldiń Gazaǵa jasaǵan shabýyldarynan qaza tapqandardyń jalpy sany 69 756-ǵa, al jaralanǵandar sany 170 946-ǵa jetken.
Gazadaǵy atysty toqtatý jáne tutqyn almasý týraly kelisim
AQSh prezıdenti Donald Tramp 9 qazanda Izraıl men palestınalyq HAMAS qozǵalysy arasynda atysty toqtatýdyń birinshi kezeńi boıynsha kelisimge qol jetkizilgenin málimdedi.
Mysyrda qol qoıylǵan bul kelisim Izraıl úkimeti maquldaǵannan keıin 10 qazanda kúshine endi.
Qol jetkizilgen kelisimge qaramastan, Izraıl armııasy ártúrli syltaýlardy alǵa tarta otyryp, palestınalyqtarǵa qarsy shabýyldardy merzimdi túrde jalǵastyryp keledi.
Aıta keteıik, Izraıldiń Gaza sektoryna jasaǵan soqqysynan 22 palestınalyq qaza tapqanyn jazdyq.
Al Izraıldiń Lıvan astanasy Beırýtqa jasaǵan áýe soqqysynan 5 adam qaza tapty.