Izraıl Ramazan aıynda Gazaǵa kúsh qoldanbaýǵa kelisti

ASTANA. KAZINFORM – Izraıl Gaza sektoryndaǵy bitimgershilik ýaǵdanyń mermizin ýaqytsha uzartýǵa kelisti. Bul týraly Kazinform tilshisi DW aqparat agenttigine silteme jasap habarlaıdy.  

AFP jáne dpa agenttikteriniń habarlaýynsha, AQSh Prezıdentiniń Taıaý Shyǵystaǵy arnaıy elshisi Stıv Ýıtkoff bitimgershilik merzimin uzartýdy HAMAS-pen atysty toqtatýdyń birinshi kezeńi aıaqtalǵannan keıingi aralyq shara retinde usynǵan. Bitimgershilik merzimi mulylman qaýymy úshin qasıetti sanalatyn Ramazan aıynda, ıaǵnı 29 naýryzǵa deıin jáne ıahýdeıler úshin qasıetti sanalatyn Pesah merekesi kezinde, ıaǵnı 12-20 sáýir aralyǵynda kúshinde bolady.

Biraq HAMAS bul usynysqa áli reaktsııa bildirgen joq. 

Sarapshylar bitimgershiliktiń dinı meıramdarǵa dóp kelgen ekinshi kezeńi Gaza sektoryndaǵy soǵysty birjola toqtaýǵa jol ashady dep úmittenip otyr. Degenmen Izraıl taraby HAMAS jasaqtarynyń qolynda qalǵan tutqyndardyń jartysy kelisim kúshine engen ýaqytqa deıin, qalǵany kelisim ýaqyty aıaqtalǵanǵa deıin bosatylýy kerek degen ustanymdy ustanady. 

Buǵan deıin bitimgershilik merzimin uzartý týraly kelisimdi keri qaıtarǵan HAMAS-tyń endigi jaýaby qandaı bolatyny ázirge beımálim.

Taıaýda ǵana HAMAS ókili Hazem Qasem Al-Araby telearnasyna Gaza sektoryndaǵy atysty toqtatýdyń ekinshi kezeńi boıynsha toppen ázirshe kelissózder júrgizilmeıtinin aıtqan bolatyn.