Izraıl Gaza sektoryna gýmanıtarlyq kómek kólemin arttyrýǵa ruqsat berdi
ASTANA. KAZINFORM — Bul sheshim ızraıldik kepilge alynǵandardyń denesin HAMAS-qa tapsyrǵannan keıin qabyldandy, dep habarlaıdy Kazinform menshikti tilshisi.
Izraıl sársenbi kúni Mysyrmen shekaradaǵy Rafah shekara beketiniń ashylýyna ruqsat beredi jáne palestınalyq HAMAS qozǵalysy Izraılge kepilge alynǵan adamdardyń denesin tapsyrǵannan keıin Gaza sektoryna gýmanıtarlyq kómektiń jiberilýin qalpyna keltiredi. Bul týraly Izraıldiń Kan qoǵamdyq telearnasy habarlady.
Izraıl úkimeti konsýltatsııalardan keıin buryn josparlanǵan sanktsııalardy gýmanıtarlyq júkterdi jetkizýge qoıylǵan shekteýlerdi jáne ótkeldi jabýdy alyp tastaý týraly sheshim qabyldady.
Telearna málimetine sáıkes, Gaza sektorynyń ońtústigin Mysyrmen baılanystyratyn Rafah shekara beketi soǵys bastalǵannan beri alǵash ret eki jaqty qozǵalys úshin qaıta ashylady.
Izraıl zaqymdalǵan ınfraqurylymdy qalpyna keltirý úshin azyq-túlik, dári-dármek jáne qural-jabdyq tasymaldaıtyn shamamen 600 júk kóliginiń ótýine ruqsat berdi. Budan basqa, soǵys kezinde sektordan qashyp ketken azamattarǵa qaıtyp oralýǵa, al palestınalyqtardyń jekelegen sanattaryna Rafah arqyly shyǵýǵa ruqsat etiledi.
Buǵan deıin Tel-Avıv Palestına tobynan ólgen adamdardyń súıegin tapsyrý jónindegi mindettemelerin oryndaýdy talap etip, Rafah shekara beketin jabyq kúıde ustaıtynyn jáne Gazaǵa gýmanıtarlyq kómek jetkizilimin azaıtatynyn jarııalaǵan. Buǵan jaýap retinde sodyrlar seısenbide Izraılge kepilge alynǵan tórt adamnyń denesin tapsyrdy. Izraıldik BAQ úsh máıittiń Izraıl azamattary ekeni anyqtalǵanyn, al tórtinshisiniń taǵdyry áli belgisiz ekenin habarlady.
Nátıjesinde Izraıl kelisim aıasynda habarlanǵan kepilge alynǵan 28 qaza tapqan adamnyń segiziniń denesin aldy.
Dıplomatııalyq derekkózderdiń habarlaýynsha, HAMAS sársenbi kúni deldaldarǵa qaza bolǵan taǵy tórt adamnyń denesin tapsyrýǵa nıetti ekenin habarlady. HAMAS máıitterdiń keıbiri úıindiler astynda jáne Izraıl armııasynyń baqylaýyndaǵy aımaqtarda qalǵanyn aıtyp otyr.
Oqıǵaǵa qatysty pikir aıtqan AQSh prezıdenti Donald Tramp «HAMAS óziniń qamaýyndaǵy máıitter sanyn burmalady» dep málimdedi. Onyń aıtýynsha, Vashıngtonǵa kepilge alynǵan 24-26 adam týraly habarlanǵan, biraq olardyń naqty sany aıtarlyqtaı tómen bolyp shyqty.
— Biz barlyǵyn qaıtarǵymyz keledi, — dedi Tramp.
Ol kelisimderdi oryndaý «bitim saqtaýdyń basty talaby» ekenin qosyp ótti.
HAMAS jaýap retinde mindettemelerin oryndaýdy jalǵastyratynyn málimdep, Shýdjaııa men Rafah aýdandarynda beıbit turǵyndardyń óliminen keıin Izraıldi «kelisimshartty eleýli túrde buzdy» dep aıyptady. HAMAS ókili Hazem Qasemniń habarlaýynsha, top deldaldardan «Izraıldi kelisim sharttaryn oryndaýǵa májbúrleýdi» talap etken.
Osy arada HAMAS jasaqtary Gaza kóshelerinde qaıta paıda boldy. Izraıl áskeri jartylaı shyǵarylǵannan keıin sodyrlar negizgi kómek kórsetý joldaryn baqylaýǵa alyp, Izraılmen yntymaqtastyq jasady dep aıyptalǵan birneshe adamdy óltirdi. Jergilikti aqparat kózderi toptyń tártip ornatyp, odan habarsyz áreket etetin qarýly toptardy joıýdy kózdep otyrǵanyn rastady.
Dúısenbide Tramp Knessette sóılegen sózinde bul «soǵystyń aıaqtalýy ǵana emes, sonymen birge terror dáýiriniń aıaqtalýy jáne senim men úmit dáýiriniń basy» dep málimdedi.
Buǵan deıin HAMAS Qyzyl Krest uıymyna ızraıldik kepilge alynǵandardyń ekinshi tobyn tapsyrdy.
Gaza sektorynyń densaýlyq saqtaý mınıstrliginiń málimetinshe, eki jylǵa sozylǵan soǵys kezinde anklavta 67 myńnan astam adam qaza taýyp, myńdaǵan adam úıindi astynda qaldy. Asharshylyq pen gýmanıtarlyq daǵdarys kezinde Rafah ótkelin ashý jáne azyq-túlik pen dári-dármek tasymaldaıtyn júzdegen júk kólikterine ruqsat berý jaǵdaıdy turaqtandyrýǵa baǵyttalǵan sheshýshi qadam bolýy múmkin.