Izraıl Rafah qalasyna shabýyldaıtyn bolsa olarǵa oq-dári berýdi toqtatamyz – Baıden

ASTANA. KAZINFORM – AQSh Prezıdenti Djo Baıden eger Izraıl Rafah qalasynda shabýyl jasaıtyn bolsa, olarǵa snarıadtar men oq-dári berý toqtatylatynyn málim etti, dep jazady BBC.

AQSh prezıdenti Djo Baıden Izraılge eger olar Gaza sektoryndaǵy Rafah qalasyna shabýyldy bastasa, qarý-jaraqtardyń keıbir túrlerin berý toqtatylatynyn eskertti.

«Eger olar Rafahqa basyp kirse, osy ýaqytqa deıin osy qalaǵa qarsy qoldanylyp kelgen qarý berýdi toqtatamyn»,-dedi Baıden sársenbi kúni CNN efırine shyqqan suhbat barysynda.

Alaıda ol qalaı bolǵan kúnde de Izraıldiń qaýipsizdigin qamtamasyz etýge kúsh salatynyn jetkizdi.

Izraıl bolsa, AQSh-tyń senimdi túrde álemge jar salýyna qaramastan HAMAS-tyń Gazadaǵy sońǵy qorǵanys orny sanalatyn Rafah qalasyna shabýylǵa daıyndalyp jatqanyn aıtyp jatyr.

Osyǵan deıin AQSh pen ózge de birqatar memleket ókilderi Gazanyń ózge aýdandarynan kelgen bosqyndarǵa tolǵan qala turǵyndarynyń sany BUU baǵalaýy boıynsha mıllıonnan asqanyn jáne mundaı jaǵdaıda júrgizilgen operatsııa kóptegen beıbit turǵyndardyń ólimine ákelip soqtyrýy múmkin ekenin birneshe ret eskertti.

«Biz qarý men artıllerııalyq snarıadtardy bermeımiz»,-dedi Baıden.

Bul rette ol Vashıngtonnyń TsAHAL-dyń Rafah qalasy men onyń aınalasyndaǵy áreketterin jerústi operatsııasy dep baǵalamaıtynyn atap ótti.

«Olar eldi mekenderge kirgen joq, tek shekarada áreket etti»,-degen Prezıdent eger Izraıl atalǵan eldi mekenderge kiretin bolsa, AQSh tarapynan qoldaýǵa ıe bolmaıtynyn anyq jetkizdi.

Baıden Amerıka qarýy Gaza sektorynda qoldanylǵanyn rastady.

Al Izrıal «qyzyl» syzyqtan ótken joq pa, degen suraqqa» «Ázirge joq» dep jaýap berdi.