Izraıl Prezıdenti Memleket basshysyn jańa Konstıtýtsııanyń qabyldanýymen quttyqtady
ASTANA. KAZINFORM — Qasym-Jomart Toqaev Izraıl Memleketiniń Prezıdenti Itshak Gertsogpen telefon arqyly sóılesti. Bul týraly Aqordanyń baspasóz qyzmeti málim etti.
Izraıl Prezıdenti Memleket basshysyn jalpyulttyq referendýmnyń tabysty ótýimen jáne Qazaqstan Respýblıkasynyń jańa Konstıtýtsııasy qabyldanýymen quttyqtady.
— Áńgimelesý barysynda prezıdentter eki el arasyndaǵy yntymaqtastyqtyń qazirgi jaı-kúıi men keleshektegi damý perspektıvasyn, ásirese, saýda-ekonomıkalyq jáne ınvestıtsııalyq yqpaldastyqty keńeıtý máselelerin talqylady. Itshak Gertsog Qasym-Jomart Toqaevtyń barlyq memleket uzaqmerzimdi ekonomıkalyq damý josparyn júzege asyrýy úshin beıbitshilik qajet degen pikirimen kelisetinin jetkizdi. Qazaqstan Prezıdenti halyqaralyq daýly máselelerdiń saıası sheshimin udaıy izdestirý kerek dep sanaıdy. Izraıl Prezıdenti Qazaqstannyń Ibrahım kelisimderine qosylý týraly sheshimin joǵary baǵalady. Onyń pikirinshe, bul Taıaý Shyǵysta beıbitshilik ornatý máselesine strategııalyq turǵydan qaraýdyń úlgisi bolmaq, — delingen habarlamada.
Eske sala keteıik, buǵan deıin Makron Toqaevty referendýmnyń tabysty ótýimen quttyqtady.
