Izraıl premeri sybaılas jemqorlyqqa qatysty sot aldynda kýálik etýde
ASTANA. KAZINFORM — Búgin Izraıl premer-mınıstri Bınıamın Netanıahý sot aldynda 2016 jyly jasalǵan sybaılas jemqorlyq deregine qatysty kýálik etip jatyr, dep habarlaıdy Kazinform menshikti tilshisi.
Oǵan para aldy, alaıaqtyq jáne senimge qııanat jasady degen aıyp taǵyldy.
Seısenbi kúni tańerteń premer-mınıstr Bınıamın Netanıahý Tel-Avıv aýdandyq sotyna aıyptalýshy retinde kelip, oǵan úsh túrli is boıynsha taǵylǵan qylmystyq aıyptar boıynsha suraqtarǵa jaýap berdi.
Otyrys qaýipsizdik maqsatynda jerasty sot zalynda ótip jatyr, óıtkeni Ierýsalım aýdandyq sotynyń ǵımaratynda qaýipsizdik sharalarymen tıisti deńgeıde qamtylmaǵan.
«4000 is»
Prokýrorlar Netanıahý Bezeq Telecom Israel (BEZQ.TA) kompanııasyna shamamen 1,8 mıllıard shekel (shamamen 500 mıllıon dollar) kóleminde jeńildik berdi dep málimdeıdi. Prokýrorlardyń aıtýynsha, onyń ornyna Izraıl premer-mınıstri kompanııanyń burynǵy tóraǵasy Shaýl Elovıch basqarǵan jańalyqtar saıtynda ózi jáne áıeli Sara týraly oń aqparat bergizgen. Osyǵan baılanysty Netanıahý para aldy, alaıaqtyq jasady jáne senimge qııanat keltirdi dep aıyptalyp otyr.
«1000 is»
Netanıahýǵa áıeli ekeýi gollıvýdtyq prodıýser jáne Izraıl azamaty Arnon Mılchannan jáne mıllıarder aýstralııalyq kásipker Djeıms Pekerden 700 000 shekelge jýyq (210 000 dollar) syılyq aldy degen aıyp taǵyldy. Prokýrorlar syılyqtardyń ishinde shampan men sıgara bolǵanyn jáne Netanıahý Mılchanǵa onyń bıznes múddelerine kómekteskenin aıtty. Bul rette Peker men Mılchanǵa aıyp taǵylǵan joq.
«2000 is»
Aıyptaýlarǵa sáıkes, Netanıahý ızraıldik «Yedioth Ahronoth» gazetiniń ıesi Arnon Mozespen ózi týraly oń aqparat berý úshin básekeles gazettiń ósýin báseńdetetin zań shyǵarý úshin kelissózder júrgizdi degen boljam bar.
Izraıl aqparat quraldarynyń habarlaýynsha, jeltoqsan aıynyń sońyna deıin Izraıl premer-mınıstri Tel-Avıvtegi paraqorlyq isi boıynsha aptasyna 3 ret kúnine 6 saǵattan kýálik etedi. Aldymen advokattary suraq-jaýap alady, sodan keıin qarsy suraq qoıylady.
Buǵan deıin halyqaralyq qylmystyq sot Netanıahý men Galantty tutqyndaýǵa order bergeni habarlanǵan bolatyn.