Izraıl premeri álemdegi elshilik qaýipsizdigin kúsheıtýdi tapsyrdy

IERÝSALIM. KAZINFORM – Izraıl Premer-mınıstri Bınıamın Netanıahý Vashıngtondaǵy Izraıl elshiligi qyzmetkerlerine jasalǵan shabýyldan keıin, álem boıynsha Izraıl dıplomatııalyq ókildikterinde qaýipsizdik sharalaryn kúsheıtýdi tapsyrdy. Bul týraly ol áleýmettik jelide (X platformasynda) habarlady, dep jazdy Anadoly.

Netanıahý AQSh Bas prokýrory Pem Bondı jáne Vashıngtondaǵy Izraıl elshisi Iehıel Leıtermen telefon arqyly sóıleskenin málimdedi. Onyń aıtýynsha, elshiden shabýyl týraly egjeı-tegjeıli aqparat alǵan.

Sondaı-aq premer shabýyldaýshynyń kim ekeni jáne oqıǵa jaıly tolyq derekter týraly AQSh bas prokýrorymen sóılesý barysynda bilgenin aıtty.

Gaza sektoryndaǵy áskerı áreketterdi jalǵastyrýdy qoldap otyrǵan Netanıahý (bul qaqtyǵystarda 53 myńnan astam palestınalyq qaza tapqan) Vashıngtondaǵy shabýyldy «antısemıttik áreket» dep atady.

Onyń aıtýynsha, Izraıldiń barlyq sheteldegi ókildikteriniń qaýipsizdik deńgeıin barynsha arttyrý týraly buıryq berilgen.

Vashıngtonda bolǵan qarýly shabýyl saldarynan Izraıl elshiliginiń eki qyzmetkeri qaza tapty.

AQSh burynǵy prezıdenti Donald Tramp Truth Social jelisinde:

– AQSh-ta jek kórýshilik pen radıkalızmge oryn joq. Qaıtys bolǵandardyń otbasyna kóńil aıtamyn. Mundaı jaıttardyń bolýy – óte ókinishti, – dep jazdy.

AQSh memlekettik hatshysy Marko Rýbıo da shabýyldy aıyptap,

«Biz qaza tapqandardyń jaqyndarymen birge duǵa etemiz», – dedi X áleýmettik jelisinde.

Vashıngton polıtsııasynyń basshysy Pamela A. Smıttiń habarlaýynsha, shabýyl jasaǵan adam 30 jastaǵy Elıas Rodrıges ekeni anyqtalǵan. Ol qamaýǵa alynǵannan keıin «Palestınaǵa bostandyq!» dep aıqaılaǵan.

Buǵan deıin habarlanǵandaı, Bınıamın Netanıahý halyqaralyq qylmystyq sot orderine qaramastan Býdapeshtke barǵan bolatyn.