Izraıl polıtsııasy taǵy da ál-Aqsaǵa shabýyl jasady
IERÝSALIM. QazAqparat – Ierýsalımde Ǵıbadathana taýyndaǵy ál-Aqsa meshiti ekinshi tún qatarynan shıelenis ortalyǵyna aınaldy. Izraıl polıtsııasy ondaǵan adam barrıkadalanǵan musylmandardyń kıeli ordasyna kiretin jerge taǵy da shabýyl jasady, dep habarlaıdy QazAqparat Euronews-ke silteme jasap.
Meshit isteri jónindegi dinı basqarma ókilderiniń málimdeýinshe, konfrontatsııa kezinde kúshtik qurylym qyzmetkerleri jaryq-shý granattaryn paıdalanyp, rezeńke oq atqan. Palestınalyq Qyzyl aı kem degende alty adam zardap shekkenin aıtty.
Teketires musylmandardyń qasıetti aıy – Ramazan men evreılerdiń merekesi – Pesah aıasynda shıelenisip otyr. Túrli aýdandardan tártipsizdikter, palestınalyqtar men ızraıldikter arasyndaǵy qaqtyǵys, onyń ishinde qarý qoldanylǵan janjaldar týraly aqparattar túsip jatyr. Izraıl bıligi palestınalyqtardyń aýmaǵyn pashalyq qorshaýǵa alý bastalǵanyn málimdedi. Áskerıler Gaza sektorynan zymyranmen oq atý jalǵasyp jatqanyn habarlady.
Jaǵdaıdy polıtsııanyń sársenbige qaraǵan túni ál-Aqsa aldyndaǵy operatsııasy ýshyqtyryp jiberdi. Izraıl kúshteri meshitke basyp kirip, sol jerde palestınalyq belsendilermen teketires jalǵasqan. ІІM málimeti boıynsha, 350-den astam adam ustaldy. Ramazan kezinde qasıetti oryndaǵy kúsh kórsetýdi Arab memleketteri lıgasy synǵa aldy. AQSh shıelenisti azaıtýǵa shaqyrdy. BUU memlekettik hatshysy Antonıý Gýterrısh qapa bolǵanyn málimdedi.
Buǵan deıin Izraıl polıtsııasy Shyǵys Ierýsalımdegi ál-Aqsa meshiti aýmaǵyna tekseris júrgizý kezinde sársenbi kúni tańda palestınalyq dinshilderdi tutqyndaǵany habarlanǵan bolatyn. Jergilikti bılik ókilderiniń sózinshe, sársenbi kúni 400-den asa palestınalyq azamat tutqyndalǵan, olar Izraılde qamaýda otyr.
