Izraıl Parlamenti narazylyqtarǵa qaramastan bıýdjetti bekitti
ASTANA.QazAqparat – 23 mamyrda myńdaǵan ızraıldik Bınıamın Netanıahý úkimetiniń ekonomıkalyq saıasatyna narazylyq bildirý úshin sherýge shyqty, dep habarlaıdy QazAqparat Euronews-ke silteme jasap.
Izraıl parlamenti jappaı narazylyqtarǵa qaramastan 2023 jáne 2024 jyldarǵa arnalǵan bıýdjetti qabyldady.
Seısenbi kúni myńdaǵan ızraıldik úkimettiń áreketine narazylyq bildirý úshin Ierýsalım arqyly Knesset ǵımaratyna bet aldy.
Bul ýaqytta parlament premer-mınıstr Bınıamın Netanıahýdyń bıýdjeti men «ekonomıkalyq josparyna» daýys berýge daıyndalyp jatqan bolatyn.
Narazylyq bildirýshiler úkimettiń qarjylyq baǵdarlamasynda ýltra-pravoslavtyq odaqtastarǵa tym kóp jeńildikter bar dep sanaıdy.
«Bul memlekettik bıýdjet emes, jappaı tonaý. Bulaı Izraıl ekonomıkasyn qurtyp, bolashaq urpaqqa úlken zııan keltirýge bolady», - dedi narazylyq aktsııasyna qatysýshylar.
Sherýshiler basqarýshy koalıtsııany «tonaýshy» dep aıyptady.
Eger bıýdjet 29 mamyrǵa deıin qabyldanbasa, parlament avtomatty túrde taratylyp, jańa saılaý qajet bolatyn.
