Izraıl parlamenti palestınalyqtardy ólim jazasyna taǵaıyndaıtyn zań jobasyn maquldady

Izraıl Knesseti (parlament) adam shyǵynyna ákeletin shabýyl jasaǵany úshin sottalǵan palestınalyqtarǵa ólim jazasyn taǵaıyndaıtyn zań jobasyn basym daýyspen maquldady. The Times of Israel basylymynyń habarlaýynsha, zań jobasyn 62 depýtat qoldady, 48-i qarsy daýys berdi.

Zańǵa sáıkes, ızraıldik azamatty óltirgeni úshin kináli dep tanylǵan Batys jaǵalaý turǵyndary úshin negizgi jaza - darǵa asý arqyly ólim jazasyna kesý. Sot ómir boıy bas bostandyǵynan aıyrýdy tek «erekshe jaǵdaıda» ǵana taǵaıyndaı alady.

Zań tek aldaǵy isterge qoldanylady. Ólim jazasyn taǵaıyndaý úshin birneshe sýdıanyń daýysy jetkilikti, al apellıatsııalyq shaǵym berý quqyǵy alynyp tastalady. Zańnyń qabyldanýy bastamany belsendi túrde alǵa tartqan «Ottsma Iehýdıt» partııasy men ońshyl kúshter úshin saıası jeńis boldy. Izraıl premer-mınıstri Bınıamın Netanıahý daýys berýge jeke ózi qatysyp, zań jobasyn qoldady.

- Bul qurbandar úshin ádilettilik kúni jáne jaýlarymyz úshin úreı kúni bolady. Terrorızmdi tańdaǵan adam ólimdi tańdaıdy, - dedi Izraıldiń ulttyq qaýipsizdik mınıstri Itamar Ben-Gvır.

Atalmysh zań adam quqyqtary uıymdary tarapynan qatań synǵa ushyrady.

Izraıldegi Azamattyq quqyqtar qaýymdastyǵy Joǵarǵy Sotqa ómir súrý, teńdik jáne ádil sot isin júrgizý quqyǵyn qosa alǵanda, negizgi quqyqtardyń buzylýyn aıtyp, zańnyń kúshin joıýdy talap etip ótinish berdi.

Ramalladaǵy Palestına ákimshiligi zańnyń qabyldanýyn «qaýipti shıelenis» dep atap, onyń sottan tys óltirýlerdi zańdastyrýǵa baǵyttalǵanyn málimdedi.

BUU-nyń Adam quqyqtary jónindegi basqarmasy ólim jazasy halyqaralyq mindettemelerge qaıshy keletinin jáne ony qatygez ári qorlaıtyn jaza dep sanaýǵa bolatynyn atap ótti.

Sarapshylar Izraıl Joǵarǵy Sotynyń zań jobasyn qaıta qaraýyn, ony júzege asyrý aımaqtaǵy shıelenisti kúsheıtýi múmkin ekenin eskertti.

Aıta keteıik, Izraıldiń Gazadaǵy shabýyldarynan 2025 jylǵy 10 qazannan beri 702 adam qaza tapty.