Izraıl parlamenti Batys jaǵalaýdaǵy qonystar anneksııasy týraly zań jobasyn maquldady

ASTANA. KAZINFORM – Bılik koalıtsııasy ishinde daý týdyrǵan bul saıası bastama Netanıahý kabıneti úshin jańa synaq boldy, dep habarlaıdy Kazinform tilshisi.

Sársenbi kúni Izraıl Knesseti (parlament) Izraıldiń Iordan ózeniniń Batys jaǵalaýyndaǵy evreı eldi mekenderiniń egemendigin keńeıtetin zań jobasyn aldyn ala oqýdy maquldady. Bul týraly ızraıldik BAQ habarlaıdy.

«Noam» ońshyl partııasynyń depýtaty Avı Maoz usynǵan bastama 24-ke qarsy 25 daýyspen, ıaǵnı az ǵana artyqshylyqpen qabyldandy.

Kezdesý mańyzdy ishki saıası oqıǵaǵa aınaldy, óıtkeni zań jobasyn Izraıl premer-mınıstri Bınıamın Netanıahý men onyń daýys berýge qatysýdan qalys qalǵan «Lıkýd» fraktsııasynyń kópshiliginiń ustanymyna qaıshy keletin ońshyl partııalardyń ókilderi qoldady.

Belgilengen tártipke sáıkes, qujat zańdy kúshine enýi úshin ol Halyqaralyq ister jáne qorǵanys komıtetinde taǵy úsh oqylym men talqylaýdan ótýi tıis. Tipti bul kezeńderden sátti ótken bolsa da, onyń túpkilikti maquldaný yqtımaldyǵy tómen dep sanalady, óıtkeni mınıstrler kabıneti dıplomatııalyq daǵdarys týdyrýy múmkin birjaqty qadamdarǵa qarsy.

Bastama avtory Avı Maoz málimdegendeı, zańnyń maqsaty – «Egemen Izraıl memleketiniń quramdas bóligi retinde Iýdeıa men Samarııadaǵy (Batys jaǵalaýy – red.) eldi mekenderdiń mártebesin bekitý».

- Izraıl jeri evreı halqyna berildi jáne eki myń jyldyq qýǵyn-súrginnen keıin ol jerde egemendik ornatý – bizdiń mindetimiz, - dedi ol.

Depýtattar sonymen birge Izraıldi Ierýsalımge jaqyn ornalasqan eń úlken Maale-Adýmım eldi mekenine deıin keńeıtý týraly taǵy bir zań jobasyn maquldady. Bul qujatty «Izraıl bizdiń úıimiz» partııasynyń jetekshisi Avıgdor Lıberman engizdi.

Bıliktegi «Lıkýd» partııasynyń birneshe mınıstri men depýtaty, sonyń ishinde bilim mınıstri Ioav Kısh mundaı sheshimder tek amerıkalyq taraptyń qatysýymen qabyldanýy kerek dep málimdedi.

- Men egemendikti jaqtaımyn, biraq biz Vashıngtondaǵy seriktesterimizben kelise otyryp áreket etýimiz kerek, - dep atap ótti mınıstr.

Partııanyń ózi bul sheshimdi «trollıng» dep atady.

- Bul AQSh-pen qarym-qatynasymyzǵa jáne Izraıldiń saılaý naýqanyndaǵy mańyzdy jetistikterine nuqsan keltirýge baǵyttalǵan oppozıtsııanyń kezekti trollıngi, - delingen «Lıkýd» málimdemesinde.

Izraıl syrtyndaǵy reaktsııa da ótkir boldy. Marko Rýbıo bastaǵan AQSh Memlekettik departamenti anneksııa týraly zańdardyń qabyldanýy AQSh prezıdenti Donald Tramptyń Gazadaǵy qaqtyǵysty toqtatý jónindegi beıbit josparyna qaýip tóndiretinin eskertti.

Saýd Arabııasy Knessettiń sheshimin aıyptap, ony «zańsyz eldi mekenderge Izraıldiń baqylaýyn zańdastyrý áreketi» dep atady jáne 1967 jylǵy shekaralarda astanasy Shyǵys Ierýsalım bolatyn táýelsiz Palestına memleketin qurýdy qoldaıtynyn qaıtalady.

Bıliktiń ortalyq ınstıtýty Knesset bolǵan Izraıl úshin mundaı daýys berý – kóbinese saıası tepe-teńdiktiń ındıkatory.

Aldyn ala oqylymda qabyldanǵan zań jobalarynyń zańdyq máni shekteýli bolǵanymen, olardy talqylaý ultshyl toptar yqpalynyń kúsheıýin jáne Netanıahý úkimetine onyń oń jaqtaǵy odaqtastary tarapynan qysymnyń kúsheıýin tanytyp otyr.

Buǵan deıin Izraıl men HAMAS atysty toqtatý kelisimi aıasynda tutqyn almasýyn jalǵastyryp otyrǵanyn jazǵan bolatynbyz.