Izraıl Palmıraǵa áýeden shabýyl jasap, 36 adam kóz jumdy

ASTANA. KAZINFORM – Izraıl armııasy Sırııanyń tarıhı qalasy Palmıraǵa jasaǵan áýe shabýylynan 36 adam kóz jumyp, taǵy 50 adam jaralandy. Áýe soqqylary turǵyn úıler men óndiristik oshaqtarǵa jasalǵan, dep habarlaıdy Kazinform-nyń menshikti tilshisi.

«Sársenbi kúni jergilikti ýaqytpen saǵat 13:30 shamasynda qalanyń tarıhı bóligi bolyp sanalatyn at-Tanf aýdanyna zymyrandar qulap, onyń saldarynan 36 adam kóz jumdy, taǵy 50 adam jaraqat aldy», — delingen sırııalyq SANA aqparat agentti taratqan habarlamada.

At-Tanf — Sırııanyń ońtústik-shyǵys bóligindegi Irak shekarasyna jaqyn jatqan aýdan. Bul aýdandy AQSh áskeri baqylaıdy.

Aıta ketsek, Sırııanyń Palmıra qalasy ıÝNESKO-nyń tarıhı muralar tizimine engen. Kóne shahar ataýy týraly alǵashqy derekter bizdiń dáýirimizge deıingi ekinshi myńjyldyqtarda kezdesedi. Elde soǵys bastalmaı turǵanda qala Sırııadaǵy eń basty týrıstik ortalyqtyń biri sanalǵan. Soǵys saldarynan mundaǵy tarıhı eskertkishter qatty zaqymdandy. Mamandar kóne qala joıylyp ketý qaýpi tónip tuǵanyn aıtýda.

Buǵan deıin habarlaǵanymyzdaı, AQSh qarýly kúshteri Sırııadaǵy Iran qoldaıtyn sodyrlar tobynyń qarý-jaraq qoımasyna soqqy berdi. Bul Sırııanyń soltústik-shyǵysyndaǵy amerıkalyq bazaǵa jasalǵan zymyran shabýylynan keıingi ekinshi operatsııa.