Izraıl palestınalyq tutqyndardy bosatý isin keıinge qaldyrdy

ASTANA. KAZIFORM – 22 aqpanǵa belgilengen 600-den astam palestınalyq tutqyndy bosatý isi HAMAS-tyń birneshe ret kelisim talaptaryn buzýyna baılanysty keıinge qaldyryldy, dep málimdedi Izraıl bıligi.

Bul týraly DW habarlady.

Gaza sektorynda atysty toqtatý týraly kelisim aıasynda palestınalyq tutqyndardy bosatý isi kepilge alynǵan ızraıldikterdi berý kezinde HAMAS tarapynan jasalatyn basyný áreketteri toqtamaıynsha, keıinge qala beredi.

Bul týraly Izraıl premer-mınıstri Bınıamın Netanıahý jeksenbige qaraǵan túni, 23 aqpan kúni jasady.

- HAMAS tarapynan osyǵan deıin birneshe márte qaıtalanǵan, kepilge alynǵan bizdiń azamattardy basyný men kópshilikke nasıhat úshin kepildiktegilerge jasalǵan arsyzdyq  áreketterine baılanysty keshegi kúnge josparlanǵan lańkesterdi bosatý týraly isti keıinge qaldyrý jóninde sheshim qabyldandy. Biz kepildiktegilerdi berý kezinde basyný áreketteri bolmaıtynyna kepildik berilmeıinshe qımyldamaımyz, - delingen Netanıahý keńsesiniń málimdemesinde.

HAMAS 22 aqpan kúni 6 Izraıl azamatyn bosatyp, ózderi tarapynan kelisimniń birinshi kezeńiniń aıaqtalǵanyn málimdedi. Izraıl sol kúni túrmeden 602 palestınalyq tutqyndy bosatýy kerek bolatyn. Keshkisin HAMAS olardy bosatý isi keshigip jatqanyn aıtyp, Izraıldiń atysty toqtatý týraly kelisimdi óreskel buzǵanyn jetkizdi.

3 naýryzǵa deıin sozylatyn osy kezeń aıasynda 25 Izraıl azamaty bosatylyp, 8 adamnyń máıiti berilýi kerek edi. Izraıl tarapy áli 4 adamnyń máıitin kútip otyr.

HAMAS osyǵan deıin Izraıl áskerin anklavtan shyǵaryp, janjaldasýshy tarap ekijaqty tolyqtaı kelisimge kelgen jaǵdaıda Gaza sektoryndaǵy kepilge alynǵandardyń barlyǵyn bir mezette bosatýdy usynǵan bolatyn.

Osyǵan deıin habarlaǵanymyzdaı, HAMAS Izraıldiń kepildegi alty azamatyn bosatty, olardyń ekeýi shamamen 10 jyl tutqynda bolǵan.