Izraıl «Palestınalyq ıslam jıhadynyń» Sırııadaǵy komandalyq pýnktine soqqy jasady

ASTANA. KAZINFORM – Izraıl áýe kúshteri Damaskige soqqy jasady. TsAHAL nysana Palestınadaǵy «Islam jıhady» komandalyq pýnkti ekenin aıtty, dep habarlaıdy Euronews. 

Izraıl qorǵanys mınıstriniń málimdeýinshe, beısenbi kúni lańkestikke qarsy operatsııa aıasynda Izraıldiń joıǵysh ushaqtary Damaskige áýeden soqqy jasady.

- Bizdiń jaýyngerlik ushaǵymyz Izraılge qarsy lańkestik áreket josparlanǵan kez kelgen jerde paıda bolady, - dep ýáde berdi Israel Kats.

Sırııalyq BAQ-tyń habarlaýynsha, másele Damaskiniń shetindegi Damar turǵyn úı keshenindegi kópqabatty úıge baǵyttalǵan maqsatty soqqy týraly boldy. Shabýyl bolǵan jerde qalyń tútin kórinip tur. Habarlanǵandaı, kem degende bir adam qaza taýyp, birneshe adam jaraqat alǵan.

TsAHAL keıinirek soqqynyń nysanasy «Palestınalyq ıslam jıhadynyń» komandalyq pýnkti bolǵanyn naqtylady.

- TsAHAL lańkestik uıymdardyń Sırııa aýmaǵynda bekinip, Izraıl memleketine qarsy áreket etýine jol bermeıdi jáne kez kelgen mundaı áreketke batyl jaýap beredi, - delingen Izraıl Qorǵanys armııasynyń málimdemesinde.

Damaskiniń shetindegi komandalyq ortalyq «Palestınalyq ıslam jıhadynyń» Izraıl memleketine qarsy lańkestik áreketterin josparlaý jáne baǵyttaý úshin paıdalanylǵan, delingen habarlamada.

Osyǵan deıin Izraıl áýe kúshteriniń Damasktiń ońtústigine soqqy jasaǵany týraly jazdyq.