Izraıl-Palestına qaqtyǵysy: Tutqyndardy bosatý jumaǵa qaldyryldy

Buǵan deıin jarııalanǵan tórtkúndik bitimgershilik jáne tutqyndardy bosatý kelisimi jumaǵa qaldyryldy. Bul týraly sársenbi keshinde belgili boldy. Kazinform agenttigi bul týraly Euronews-ke silteme jasap habarlaıdy.

BAQ habarlaýynsha, bul taraptardyń, sonyń ishinde kelissózder júrgizýde deldal bolǵan Katardyń kelisimniń egjeı-tegjeıin rettemeýine baılanysty boldy.

Buǵan deıin belgili bolǵandaı, Izraıl túrmelerge qamaǵan 150 áıel men jasóspirimdi bosatýy, al HAMAS sodyrlary 7 qazanda tutqynǵa alǵan 50 áıel men balany bosatýy tıis edi.

Premer-mınıstr Bınıamın Netanıahý jurtshylyqty bul kelisimniń durys sheshim bolǵanyna sendirýge tyrysty.

«Tutqyndardy qaıtarý boıynsha áskerı operatsııa barlyq jaǵdaıda múmkin emes. Sondyqtan biz kútpeımiz. Biz tutqynǵa alynǵan azamattarymyzdy bosatý úshin barlyq múmkindikterdi paıdalanýdamyz. Sebebi olardy qaıtarý – kıeli mıssııa. TsAHAL jáne qaýipsizdiktiń barlyq qyzmetteri bul jospardy tolyq qoldap otyr», - dep málimdedi Izraıl premer-mınıstri Bınıamın Netanıahý.

Izraıl tórtkindik bitimgershilikti kútip júrip Gaza jáne onyń syrtynda qurlyqtaǵy jáne áýedegi operatsııasyn jalǵastyryp otyr.

Habarlanǵandaı, keshe Lıvannyń ońtústiginde «Hezbollah» elıtaly arnaıy jasaǵynyń komandıri Saradj Shahımı óltirildi.

Netanıahý bitimgershilik aıaqtalǵan soń HAMAS jáne onyń odaqtastaryna qarsy soǵys qımyldary «absolıýtti jeńiske» deıin jalǵastyrylatynyna ýáde berdi.

Gazanyń HAMAS qozǵalysy basqaryp otyrǵan Densaýlyq saqtaý mınıstrliginiń málimetinshe, ızraıldik naýqan saldarynan Palestınanyń 14 myńnan astam azamaty mert boldy, sonyń ishinde 5 myńy – balalar.