Izraıl-Palestına qaqtyǵysy tek saıası jaǵdaı bolýdan qaldy – Túrkııa Elshisi
ASTANA. KAZINFORM – Izraıl men Palestına arasyndaǵy qaqtyǵys «tek saıası jaǵdaı» bolýdan qaldy. Bul týraly Túrkııa Respýblıkasynyń Qazaqstandaǵy Elshisi Mustafa Kapýdjý agenttikke bergen suhbatynda aıtty.
Óz sózinde Elshi gýmanıtarlyq tragedııa bolyp jatqanyn basa aıtty.
«Buǵan tek saıası jaǵynan baǵa berý qate bolady. Palestınalyq baýyrlarymyz, ásirese áıelder men balalar qyrshynnan ketip jatqanda únsiz qalýǵa bolmaıdy. HHІ ǵasyrda mundaı tragedııalyq jaǵdaı – Túrkııa tarapynan qabyldanbaıtyn, adamshylyqqa jatpaıtyn jaǵdaı. Ońtústik Afrıka Respýblıkasy tarapynan Izraıldiń 1948 jylǵy genotsıd qylmysynyń aldyn alý jáne jazalaý Konventsııasynan týyndaıtyn mindettemelerin buzýyna baılanysty Izraılge qarsy BUU Halyqaralyq sotyna (ICJ) jasaǵan ótinishti elimiz protsesstiń basynan beri baqylap keledi. Sot protsesine qosylý múmkindikterin muqııat baǵalaǵan soń, bıyl 1 mamyrda Syrty ister mınıstrimiz Hakan Fıdan elimizdiń sot protsesine qosylý sheshimin jarııalady. 7 tamyzda Izraılge qarsy ashylǵan sotqa qosylýǵa resmı ótinishimiz – BUU Halyqaralyq soty (ICJ) jarǵysynyń 63-baby aıasynda genotsıd konventsııasyna jaqtas el retinde usynyldy», - dedi M. Kapýdjý.
Elshiniń aıtýynsha, beıbit turǵyndarǵa jasalǵan bul shabýyldar basqa memleketterdiń saıası ǵana emes, moraldyq jáne adamgershilik jaǵynan da qarsylyǵyn týdyrýy kerek.
«Biz, Túrkııa osylaı oılaımyz, bul jaǵdaıǵa osy turǵydan qaraımyz. Eger bul toqtatylmasa, ókinishke qaraı, ózińiz de aıtyp ótkendeı, qaýipsizdik jaǵynan problemalar týyndaýy múmkin. Bul búkil álemdegi ortaq problema bolyp otyr. Sondyqtan Izraıldiń bul áreketterin birge toqtatýǵa tyrysý jolynda báriniń buǵan qarsy birlesip áreket etýin qamtamasyz etý úshin naqty qadamdar jasalýy kerek. Túrkııa basqa memleketterdi jáne halyqaralyq uıymdardy bul taqyrypta naqty qadamdar jasaýǵa shaqyrýdy jalǵastyra beredi. Sońǵy qadam jasalǵansha jáne bul shabýyldar toqtaǵansha Túrkııanyń ustanymy esh ózgermeıdi», - dedi Qazaqstandaǵy Túrkııa Elshisi.
