Izraıl Palestına aýmaǵynda 8 myńnan astam turǵyn úı salýdy josparlap otyr — BUU
ASTANA. KAZINFORM — Izraıl basyp alǵan Batys jaǵalaý men Shyǵys Ierýsalım aýmaǵynda 8 myńnan astam jańa turǵyn úı salýdy josparlap otyr. BUU málimetinshe, bul jospar Izraıl eldi mekenderin keńeıtýge baǵyttalǵan, dep jazady BUU jańalyqtar qyzmeti.
Sonymen qatar Batys jaǵalaýda palestınalyqtarǵa qarsy qonystanýshylardyń zorlyq-zombylyǵy buryn-sońdy bolmaǵan deńgeıge jetken. Al Gaza sektoryndaǵy atysty toqtatý kelisimi áli de turaqsyz kúıde qalyp otyr
Bul málimdemeni 28 qyrkúıekte BUU Qaýipsizdik Keńesiniń otyrysynda Taıaý Shyǵystaǵy beıbitshilik protsesi jónindegi arnaıy úılestirýshiniń mindetin atqarýshy Ramız Alakbarov jasady. Ol BUU Bas hatshysynyń 2016 jylǵy 2334 qarardyń oryndalýy týraly kezekti baıandamasyn tanystyrdy. Baıandama 13 maýsym men 18 qyrkúıek aralyǵyndaǵy kezeńdi qamtıdy.
2334 qararynda Izraılden «okkýpatsııalanǵan Palestına aýmaǵynda, sonyń ishinde Shyǵys Ierýsalımde eldi mekender salýdy dereý jáne tolyq toqtatý» talap etiledi.
Alaıda Alakbarovtyń aıtýynsha, esepti kezeńde Izraıldiń josparlaý organdary Batys jaǵalaýda shamamen 4570 turǵyn úı, al Shyǵys Ierýsalımde 3515 turǵyn úı salý josparyn maquldaǵan nemese onyń iske asýyna jol ashqan.
Izraıldiń Turǵyn úı qurylysy mınıstrligi S aımaǵynda shamamen 2240 turǵyn úı salýǵa tender jarııalaǵan. Onyń ishinde 1234 úı Ierýsalım mańyndaǵy E1 aýdanynda boı kótermek.
Gaza men Batys jaǵalaýdaǵy jaǵdaı
— Gaza sektoryndaǵy gýmanıtarlyq jaǵdaı óte aýyr kúıinde qalyp otyr. Sońǵy aılarda azyq-túlik pen gıgıenalyq zattardy jetkizý kólemi artqanymen, densaýlyq saqtaý salasyndaǵy jaǵdaı áli de syn kótermeıdi, — dedi arnaıy úılestirýshiniń mindetin atqarýshy.
Onyń aıtýynsha, Izraıl armııasy «sary syzyq» dep atalatyn sheptiń batysynda áskerı operatsııalaryn jalǵastyrǵan. Onyń ishinde halyq tyǵyz ornalasqan aýdandarǵa kún saıyn áýe soqqylary jasalǵan.
Izraıl qaýipsizdik kúshteriniń Batys jaǵalaýdaǵy operatsııalary da jalǵasqan.
— Qonystanýshylardyń zorlyq-zombylyǵy buryn-sońdy bolmaǵan deńgeıge jetti. Mundaı áreketter kóbine Izraıl kúshteriniń kóz aldynda jasalady, — dedi BUU ókili.
Esepti kezeńde BUU qonystanýshylardyń 630 shabýylyn tirkedi. Sonyń saldarynan 11 palestınalyq qaza taýyp, 430 adam jaralanǵan. Olardyń 113-i Izraıl kúshteriniń áreketinen zardap shekken. Sonymen qatar 17 eldi mekennen 343 palestınalyq úıin tastap ketýge májbúr bolǵan.
Palestınalyqtardyń ızraıldikterge jasaǵan shabýyldary da jalǵasqan. 23 tamyzda Ierıhon mańyndaǵy El-Aýdja eldi mekeninde Izraıl azamatyna pyshaqpen shabýyl jasalyp, ol jaralanǵan.
Alakbarov tanystyrǵan baıandamada BUU Bas hatshysy Antonıý Gýterrısh Izraıl eldi mekenderiniń keńeıýin qatań aıyptap, olardyń eshqaısysynyń zańdy kúshi joq ekenin jáne bul halyqaralyq quqyqty óreskel buzý bolyp sanalatynyn taǵy da málimdedi.
Gýterrısh Batys jaǵalaýda palestınalyqtardyń jappaı qonys aýdarýyna baılanysty alańdaýshylyq bildirdi. Onyń aıtýynsha, tutas qaýymdar úılerin tastap ketýge májbúr bolǵan, keıbiri birneshe ret qonys aýdarǵan.
BUU Bas hatshysy okkýpatsııalaýshy tarap retinde Izraıldi palestınalyqtardy shabýyldar men qorqytýdan qorǵaýǵa shaqyrdy. Sonymen qatar palestınalyqtardyń ızraıldikterge jasaıtyn shabýyldary da toqtatylýy kerek ekenin aıtyp, barlyq kináliler jaýapqa tartylýǵa tıis ekenin málimdedi.
Aıta keteıik, Gazany qalpyna keltirý jáne qaıta qurýǵa 71,5 mlrd dollar qajet.
