Izraıl orta mektepterde uıaly telefon qoldanýǵa tyıym salady
ASTANA. KAZINFORM – Jańa shekteýler kelesi oqý jylynyń qyrkúıek aıynda engizile bastaıdy, dep habarlaıdy Kazinform agenttiginiń Taıaý Shyǵystaǵy menshikti tilshisi.
Izraıl Bilim mınıstrligi kelesi oqý jylynan bastap búkil el boıynsha orta mektepterde uıaly telefon paıdalanýǵa tyıym salatynyn jarııalady. Bul týraly The Times of Israel basylymy habarlady.
Jańa saıasatqa sáıkes, oqýshylarǵa mektep aýmaǵynda telefon paıdalanýǵa tyıym salynady. Oqýshylar qurylǵylaryn óshirip qoıýy nemese mektep ákimshiligine saqtaý úshin tapsyrýy tıis.
Mınıstrlik shekteýler qyrkúıek aıynan bastap kezeń-kezeńimen engiziletinin habarlady. Sheshim ata-analar uıymdarymen, jergilikti bılik organdarymen jáne Izraıl muǵalimder odaǵymen keńeskennen keıin qabyldandy.
Vedomstvo málimdemesine sáıkes, bul sheshim «áleýmettik baılanystardy nyǵaıtýǵa, alańdatarlyq faktorlardy tómendetýge jáne oqýǵa nazar aýdarýdy arttyrýǵa» baǵyttalǵan.
Izraıldiń bilim mınıstri Ioav Kısh bul bastamany eldiń bastaýysh mektepterinde osyndaı shekteýler engizilgennen keıin maquldady.
Osy jyldyń aqpan aıynda Izraıldiń bastaýysh mektepterinde uıaly telefondardy paıdalanýǵa tyıym salynǵan bolatyn.
Mınıstrlik sheshim qabyldamas buryn smartfondardyń balalardyń emotsıonaldyq jaǵdaıyna, áleýmettik daǵdylaryna jáne bilim berý damýyna áserine qatysty halyqaralyq zertteýler men jahandyq úrdisterdi qarastyrǵanyn málimdedi.
- Biz balalarǵa bir-birimen qaıtadan shynaıy qarym-qatynas jasaýǵa, syrtqy alańdaýshylyqtardy qysqartýǵa jáne ekransyz oqýshylar arasynda tabıǵı adamı baılanystardy nyǵaıtýǵa múmkindik berip jatyrmyz, - dedi Ioav Kısh.
ıÝNESKO málimetinshe, 2024 jyldyń sońyna qaraı álemdegi bilim berý júıeleriniń shamamen 40%-y mektepterde smartfondardy paıdalanýǵa qandaı da bir shekteýler engizdi. Bir jyl buryn bul kórsetkish shamamen 30% bolǵan.
Osyǵan deıin Májiliste «QR keıbir zańnamalyq aktilerine pedagog mártebesi jáne bilim berý máseleleri boıynsha ózgerister men tolyqtyrýlar engizý týraly» zań jobasy ekinshi oqylymda qabyldanyp, Senatqa jiberilgeni habarlandy. Oǵan qosa, Ákimshilik quqyq buzýshylyq týraly kodeksine pedagog mártebesi máseleleri boıynsha ózgerister engiziletin boldy.
Oqý-aǵartý mınıstrligi mektepterdegi smartfondy paıdalaný tártibin aıqyndaıdy.
Al 1 qyrkúıekten bastap eldegi 500 mekteptiń oqý baǵdarlamasyna jasandy ıntellekt engiziledi.
Oqý-aǵartý mınıstrligine mektepterde smartfondardy paıdalanýǵa tolyq tyıym salý quzyreti berilmek.
