Izraıl oppozıtsııasy Netanıahýmen birlesken úkimet qurýdan bas tartty
ASTANA. KAZINFORM — Izraıldegi eń iri oppozıtsııalyq «ıAshar» partııasy qazirgi premer-mınıstr Bınıamın Netanıahý qatysatyn ulttyq birlik úkimetin qurý múmkindigin joqqa shyǵardy. Bul týraly Anadolu jazdy.
Partııa ókilderi Izraıl prezıdenti Itshak Gertsogke júginip, burynǵy Bas shtab bastyǵy Gadı Aızenkotqa jańa úkimet jasaqtaýdy tapsyrýdy suramaq.
Anadolu agenttiginiń The Times of Israel basylymyna silteme jasap habarlaýynsha, «ıAshar» delegatsııasy el prezıdentimen keńes ótkizip, úkimetti tezirek jasaqtaý qajet ekenin aıtqan.
Depýtat Orıt Farkash-Hakoen Netanıahýdy qoǵam birligine kedergi keltirip otyrǵan negizgi tulǵa dep atady. Onyń sózinshe, premer-mınıstrdiń áreketteri eldegi saıası jiktelýdi kúsheıtken.
Partııa ókili Ioram Koen oppozıtsııa aldymen óz odaqtastarymen kelissóz júrgizetinin, sodan keıin ortaq ustanymdardy qoldaıtyn ózge saıası kúshterdi tartýǵa nıetti ekenin málimdedi.
Basylymnyń málimetinshe, Izraıl azamattary arasyndaǵy palestınalyqtardyń múddesin qorǵaıtyn partııalar Aızenkottyń kandıdatýrasyn qoldaǵannan keıin onyń úkimetin qoldaýǵa daıyn depýtattar sany 67-ge jetken. Al Netanıahýdy 46 parlament múshesi qoldaıdy.
Buǵan deıin 27 qazanda ótken parlament saılaýynyń qorytyndysy boıynsha Izraıldegi saıası bloktardyń eshqaısysy úkimetti óz betinshe jasaqtaýǵa jetkilikti basymdyqqa ıe bolmaǵany habarlanǵan edi. Netanıahý blogy 53 mandat, oppozıtsııalyq blok 48 mandat, al arab partııalary 19 mandat ıelengen.
