Izraıl ońtústik Lıvanǵa ondaǵan áýe soqqysyn jasady

ASTANA. KAZINFORM — Izraıl armııasy Iran qoldaıtyn toptyń ınfraqurylymyna soqqy jasaǵanyn málimdedi. Áskerıler «Hezbollany» qaıta toptasýǵa árekettendi dep aıyptaǵanyn Euronews habarlady.

Bul — ótken jylǵy «Hezbollamen» bolǵan soǵystan keıingi atysty toqtatý týraly kelisim kúshine engen sátten bergi eń aýqymdy shabýyldardyń biri.

Lıvannyń Densaýlyq saqtaý mınıstrligi habarlaýynsha, Izraıldiń Nabatııadaǵy ońtústik aımaqqa jasaǵan jańa shabýyldarynyń saldarynan keminde bir adam qaza taýyp, segiz adam jaraqat alǵan.

Lıvandyq BAQ Bofor qamaly mańynda 20-dan astam soqqy bolǵanyn jazýda. Bul — kezinde kresshilerdiń bekinisi bolǵan, keıinnen «Hezbollanyń» bazasyna aınalǵan oryn.

Izraıl Qorǵanys armııasynyń (TsAHAL) málimetinshe, soqqylar HAMAS-pen odaqtas radıkaldy shııttik toptyń ınfraqurylymyna baǵyttalǵan. Atap aıtqanda, qarý-jaraq qoımalary men jerasty týnnelderiniń shahtalary nysanaǵa alynǵan.

Izraıl sonymen qatar «Hezbollany» oq-dárilik jáne qorǵanys júıelerin saqtap, qaıta toptasýǵa árekettenip jatyr dep aıyptap, bul AQSh bastamasymen qarashada jasalǵan atysty toqtatý kelisimin buzady dep málimdedi.

Óz kúshterin Lıtanı ózeninen ońtústikke qaraı aýmaqtardan shyǵarǵanyn málimdegen sodyrlar tarapynan ázirge resmı pikir bildirilgen joq.

Izraıl ótken jylǵy qurlyqtaǵy basyp kirýden keıin Lıvan aýmaǵyndaǵy bes bıiktikti áli de baqylaýda ustap otyr.

Lıvan Premer-mınıstri Navaf Salam qaqtyǵystan qatty zardap shekken Baalbek qalasynda resmı tulǵalarmen kezdesý ótkizdi. 

— Úkimet ızraıldik áskerılerdi Lıvan aýmaǵynan shyǵarý úshin barlyq kúsh-jigerin jumsap jatyr jáne jumsaı beretin bolady, — dedi ol jýrnalısterge.

Aıta keteıik, qarasha aıynyń sońynda jasalǵan kelisimnen beri Izraıl úsh ret ońtústik Beırýtke soqqy jasaǵan. Bul áreketterge Lıvan aýmaǵynan atylǵan eki zymyran sebep bolǵan.

Buǵan deıin Izraıl áskerı-áýe kúshteri Sana halyqaralyq áýejaıyna da soqqy jasaǵan bolatyn.