Izraıl Ońtústik Lıvandy ushqyshsyz apparatpen atqylap, bitimdi taǵy buzdy
ASTANA. KAZINFORM – Izraıl Lıvandaǵy atysty toqtatý rejımin taǵy buzyp, eldiń ońtústigindegi Hadasa (Hadatha) aýdanyna ushqyshsyz ushý apparatymen soqqy jasady, dep habarlaıdy IRNA.
IRNA málimetinshe, Izraıldiń Lıvanǵa qarsy agressııasy 2024 jylǵy 1 qazanda bastalǵan. Eki aıdan keıin, 2024 jylǵy 27 qarasha, sársenbi kúni AQSh-tyń araǵaıyndyǵymen atysty toqtatý týraly kelisim jasalǵan. Alaıda Izraıl bul kelisimniń talaptaryn júıeli túrde buzyp keledi.
Kelisim erejelerine sáıkes, ızraıldik áskerı bólimsheler 60 kún ishinde Ońtústik Lıvan aýmaǵynan tolyq shyǵýy tıis edi. Soǵan qaramastan, halyqaralyq quqyq normalaryna qaıshy túrde Izraıl bul aımaqtaǵy bes strategııalyq núktede áskerin ustap qalyp, óz kúshterin shyǵarǵan joq.
Buǵan deıin habarlanǵandaı, Izraıl áskerı-áýe kúshteriniń Beırýttyń ońtústik mańyna jasaǵan áýe soqqysy saldarynan «Hezbolla» uıymynyń joǵary laýazymdy múshesi qaza tapqan. Bul – birneshe aılyq bitimnen keıingi alǵashqy osyndaı shabýyl.
Materıal seriktes agenttik IRNA tarapynan Kazinform úshin usynyldy.