Izraıl mınıstri: Aýrý juqtyrǵandar sany azaımasa, eldi tolyq jabýǵa týra keledi
NUR-SULTAN. QazAqparat - Izraıl densaýlyq saqtaý mınıstri ıÝlıı Edelshteın eldi túgel jaýyp tastamasa, COVID-19 ınfektsııasyn jeńýge tek tosyn kúshter nemese sıqyr kómektese alatynyn málim etti, dep habarlaıdy QazAqparat middleeastmonitor.com-ǵa silteme jasap.
Jergilikti Yedioth Ahronoth gazetiniń jazýynsha, ıÝlıı Edelshteın kún saıyn 2000 adamnyń aýrýǵa shaldyǵýy qaýipti jaǵdaı ekenin aıta kele, eldi tutas karantınge jaýyp tastaýdan basqa indetti toqtatýdyń tıimdi amalyn bilmeıtinin moıyndady.
Edelshteınniń aıtýynsha, kúndelikti aýrý juqtyrý deńgeıi 2000-ǵa deıin ósip, onyń ishinde ókpeni jasandy jeldetý qurylǵysymen tynys alatyndar sany 30-ǵa jetse, «el qıyn jaǵdaıǵa tap bolyp, aýrýhanalardyń barlyǵy tek COVID-19 patsıentterin emdeýge kóshýge májbúr bolady, bul jaǵdaıda ózge dástúrli qyzmetter toqtatylady».
«Eger eshqandaı tańǵajaıyp oqıǵa bolmaı, indetke shaldyǵý deńgeıi tómendemese ne bolady? Bizde ýaqyt bolsa, tolyq shekteýge barmaı, ishinara shekteý sharalaryn engizýdiń tıimdiligin baǵamdap kórer edik. Tolyq shekteýdi keıinge qaldyrar edik. Birneshe kún kútý kerek», - dedi Izraıl densaýlyq saqtaý mınıstri.
Edelshteın koronavırýsqa qarsy kúreste meıramhanalar men oıyn-saýyq oryndaryn jabý sııaqty qosymsha shekteý sharalaryn qoldanýdan bas tartty. «Men ishinara shekteý sharalarynyń tıimdiligine senbeımin. Aýrý juqtyrǵandar deńgeıi birden kúrt tómendemese, eldi tolyqtaı jabýǵa týra keledi», - dedi ol.
Sondaı-aq, ol aýrý juqtyrý deńgeıi tómendegen kezde onyń mınıstrligi ýaqytty tıimsiz paıdalanǵanyn jáne «eldi tolyq jabý - jeńilisti moıyndaǵanmen teń» degen pikirlermen kelispeıtinin málimdedi.
«Eldi tolyq jabý barlyq máseleniń sheshimi bola almaıdy. Bizdiń álemdegi basqa elderden esh aıyrmashylyǵymyz joq», - dep atap ótti ıÝlıı Edelshteın.
