Izraıl men Sırııa kelissózderdegi ilgerileý týraly habarlady, biraq áli naqty kelisim joq
ASTANA.KAZINFORM — Kelisim 99% AQSh-tyń aralasýynyń arqasynda jasaldy, dep habarlaıdy Kazinform agenttiginiń menshikti tilshisi.
Izraıl premer-mınıstri Bınıamın Netanıahý jeksenbi kúni úkimet otyrysynda Sırııamen qaýipsizdik kelissózderinde ilgerileýshilikke qol jetkizilgenin, biraq túpkilikti retteý áli alys ekenin málimdedi, dep habarlaıdy The Times of Israel.
— Biz sırııalyqtarmen birge alǵa qadam jasap jatyrmyz, birshama ilgerileýshilik bar, biraq bul áli bolashaqqa degen kózqaras qana, — dedi ol.
Izraıl premer-mınıstriniń aıtýynsha, Damask pen Beırýtpen dıalog júrgizý múmkindigi Izraıl armııasynyń Lıvandaǵy Hezbollaǵa qarsy «sheshýshi jeńisteri» arqyly ashyldy. 2024 jyly Izraıldiń soltústik shekarasyndaǵy qaqtyǵystar eki aıǵa sozylǵan soǵys pen Lıvannyń ońtústiginde TsAHAL-dyń qurlyq operatsııasymen aıaqtaldy, sodan keıin qarashada atysty toqtatýǵa qol jetkizildi. Sırııa prezıdenti Ahmad ash-Sharaa sársenbi kúni Izraılmen kelissózder «qajet» ekenin, kez kelgen bolashaq kelisim Sırııanyń áýe keńistigi men aýmaqtyq tutastyǵyn qurmetteýge jáne BUU baqylaýynda bolýy kerektigin basa aıtty.
— Eger kelisim sátti bolsa, bul basqa kelisimderge jol ashýy múmkin, — dedi ol.
Sonymen birge, ash-Sharaa osy kezeńde «Ybyraıym kelisimine» uqsas Izraılmen ymyraǵa kelý múmkindigin joqqa shyǵardy. Ol sondaı-aq Izraıl 1967 jylǵy alty kúndik soǵys kezinde Sırııadan basyp alǵan Golan jotalarynyń taǵdyryn talqylaý áli erte ekenin jáne keıinirek óz egemendigin bekitkenin málimdedi.
Óz kezeginde Netanıahý Izraıldiń Sırııadaǵy býferlik aımaqtarynan bas tartqysy kelmeıtinin jáne ońtústik-batys aımaqtardy demılıtarızatsııalaýdy, sonyń ishinde ál-Sýveıda provıntsııasyndaǵy taýly aımaq Jabal-Drýzdegi drýz azshylyǵyn qorǵaýdy qarastyryp jatqanyn túsindirdi.
The Times of Israel gazetiniń habarlaýynsha, Izraıl men Sırııa arasyndaǵy AQSh-tyń aradaǵy kelissózderi negizgi máseleler boıynsha shamamen 99% kelisimge keldi jáne bul týraly aldaǵy eki apta ishinde resmı málimdeme jasalýy múmkin.
— Biz is júzinde márege jettik. Barlyǵy habarlandyrý ýaqyty men Sırııadaǵy ishki jaǵdaıǵa baılanysty, — dedi AQSh ákimshiliginiń joǵary laýazymdy qyzmetkeri.
Izraıl men Sırııa ókilderiniń sońǵy kezdesýi 17 qyrkúıekte Londonda ótip, bes saǵattan astam ýaqytqa sozyldy. Kelissózderdiń damýy Nıý-Iorkte Netanıahý da, ash-Sharaa da qatysatyn BUU Bas Assambleıasynyń aldaǵy sessııasynyń taqyryptarynyń biri bolady.
Buǵan deıin Izraıl Ulybrıtanııa, Aýstralııa jáne Kanadanyń Palestına memleketin moıyndaǵanyn aıyptady.