Izraıl men Sırııa 25 jyldan keıin alǵash ret joǵary deńgeıde kelissózder ótkizdi

ASTANA. KAZINFORM – Izraıl men Sırııa resmı ókilderi 25 jyl ishinde alǵash ret joǵary deńgeıdegi kezdesý ótkizdi. Kelissóz Parıj qalasynda AQSh-tyń Sırııa boıynsha arnaıy ókili Tom Barraktyń qatysýymen ótti. Bul týraly The Times of Israel basylymy jazdy.

«Men Parıjde sırııalyqtarmen jáne ızraıldiktermen kezdestim. Basty maqsatymyz – dıalog pen deeskalatsııa edi, biz oǵan qol jetkizdik. Barlyq taraptar bul kúsh-jigerdi jalǵastyrýǵa daıyn ekenderin bildirdi», – dep jazdy Barrak óziniń Twitter paraqshasynda.

Ol kezdesýge naqty kimder qatysqanyn ashyp aıtqan joq. Alaıda Axios saıtynyń málimetinshe, Izraıl delegatsııasyn strategııalyq máseleler jónindegi mınıstr Ron Dermer, al Sırııa tarapyn syrtqy ister mınıstri Asad ál-Shaıbanı basqarǵan.

Izraıl men Sırııa ókilderiniń buǵan deıingi joǵary deńgeıdegi kezdesýi 2000 jyly ótken bolatyn. Ol kezde AQSh prezıdenti Bıll Klınton Izraıl premer-mınıstri Ehýd Barak pen Sırııa syrtqy ister mınıstri Farýq ash-Sharaany Batys Vırdjınııaǵa shaqyryp, beıbit kelissózder uıymdastyrǵan.

Eske sala keteıik, buǵan deıin AQSh Sırııadaǵy qaqtyǵysty toqtatýǵa ýáde berdi.