Izraıl men Lıvan kelissózderdiń jańa raýndyn Rımde ótkizedi
ASTANA. KAZINFORM — Taraptar qaýipsizdik sharalaryn jáne Lıvan bıliginiń eldiń ońtústigine baqylaýyn qalpyna keltirý máselesin talqylaýdy josparlap otyr, dep habarlaıdy Taıaý Shyǵystaǵy Kazinform agenttiginiń menshikti tilshisi.
AQSh-tyń araǵaıyndyǵymen Izraıl men Lıvan arasyndaǵy kelissózderdiń jańa raýndy kelesi aptada Rımde ótedi. Bul týraly beısenbi kúni Izraıl sheneýnigi The Times of Israel basylymyna habarlaǵan.
Italııa astanasyndaǵy kelissózder eki kúnge sozylady. Kezdesýdiń seısenbi nemese sársenbi kúni bastalatyny ázirshe naqty sheshilgen joq. Izraıldiń KAN telearnasynyń habarlaýynsha, kezdesýler aldyn ala 15-16 qyrkúıekke josparlanǵan.
Taraptar Lıvannyń ońtústigindegi «Hezbollanyń» qarýly kúshteri bolmaýǵa tıis eki pılottyq aýmaqty tekserý tetigin qurý máselesin talqylaıdy dep josparlanyp otyr. Tekserý júrgizetin kúshterdiń quramy, ókileti men jumys tártibi ázirshe jarııalanǵan joq.
Vashıngton sondaı-aq Izraıl áskeri shyǵarylýǵa tıis aýmaqtardy keńeıtýdi jáne keıin olardy Lıvan armııasynyń baqylaýyna berýdi kózdep otyr.
AQSh Memlekettik departamentiniń ókili Vashıngton Lıvannyń ońtústigindegi turǵyndardyń memlekettik egemendikti qalpyna keltirý jáne eldi mekenderde «Hezbollanyń» qarý-jaraǵyn ornalastyrýdy toqtatýdy talap etken úndeýlerin baqylap otyrǵanyn málimdedi.
— Biz Lıvan úkimetin úshjaqty negizdemelik kelisimde kózdelgendeı, eldiń búkil aýmaǵynda qarýsyzdaný josparyn ázirleýge úndeımiz, — dedi amerıkalyq sheneýnik.
Lıvan tarapy kelissózderdiń jańa raýndy ótetinin ázirshe resmı túrde rastaǵan joq.
14 sáýirden beri Izraıl men Lıvan arasynda tikeleı kelissózderdiń jeti raýndy ótti. Onyń beseýi Vashıngtonda, keıingi ekeýi Rımde uıymdastyryldy. Lıvannyń shııttik «Hezbolla» qozǵalysy bul baılanystarǵa qarsy shyǵyp, úkimetti kelissózderdi toqtatýǵa úndep otyr.
Altynshy raýndtyń qorytyndysy boıynsha taraptar Izraıl áskerin kezeń-kezeńimen shyǵarý jáne Lıvan armııasynyń bólimderin ornalastyrý úshin eki pılottyq aýmaqty anyqtaý týraly aldyn ala ýaǵdalasqan.
Kelissózderdiń jetinshi raýndy 4-6 tamyz aralyǵynda Rımde ótti. Lıvan premer-mınıstri Naýaf Salam úkimet Izraıl áskerin tolyq shyǵarýǵa jáne turǵyndardyń eldiń ońtústigine qaýipsiz oralýyna qol jetkizý úshin kelissózder protsesin jalǵastyratynyn málimdegen.
Kelissózder taraptardyń bir-birin qol jetkizilgen kelisimderdi buzdy dep aıyptaýy jaǵdaıynda ótip jatyr.
The Lebanese army says Israel has violated the June framework agreement aimed at ending the war, disarming Hezbollah and a phased withdrawal of Israeli troops from southern Lebanon approximately 7,700 times. 🔴 Follow our LIVE coverage: https://t.co/Q94tVphUig https://t.co/VRYIDjYg9d
— Al Jazeera English (@AJEnglish) September 9, 2026
Lıvan armııasynyń habarlaýynsha, 26 maýsymda negizdemelik kelisimge qol qoıylǵannan beri Izraıl tarapynan 7 700 zańbuzýshylyq tirkelgen. Al Izraıl «Hezbollany» qarýsyzdandyrýdy jáne qozǵalystyń shekara mańyndaǵy qyzmetin toqtatýdy talap etip otyr.
Eske salaıyq, buǵan deıin Lıvan men Izraıl Rımde tikeleı kelissózderdiń jetinshi kezeńin bastaǵanyn habarlaǵan edik.
