Izraıl men Lıvan bitimdi taǵy bir jarym aıǵa uzartty
ASTANA. KAZINFORM — AQSh-tyń araǵaıyndyǵymen Izraıl men Lıvan 16 sáýirden beri kúshinde bolǵan atysty toqtatý rejımin uzartýǵa kelisti, dep habarlaıdy Kazinform agenttigi Euronews-ke silteme jasap.
Izraıl men Lıvan Vashıngtonda ótken eki kúndik kelissózderden keıin atysty toqtatý rejımin taǵy 45 kúnge uzartýǵa kelisti. Bul týraly AQSh Memlekettik departamentiniń ókili Tommı Pıgott málimdedi.
Sheshim «Hezbolla» tobymen jasalǵan aldyńǵy bitim merziminiń aıaqtalýyna bir táýlikten sál ǵana ýaqyt qalǵanda qabyldandy. AQSh pen Izraıl bul topty terrorıstik uıym dep tanyǵan.
Bitim kezinde top Izraıldiń soltústigine ushqyshsyz ushý apparattaryn jiberýdi jalǵastyrǵan, al Izraıl áskeri óz kezeginde «Hezbolla» nysandaryna soqqy jasap otyrǵan.
14 mamyrda Izraıl men Lıvan arasyndaǵy tikeleı kelissózderdiń úshinshi kezeńi Vashıngtonda bastalǵany habarlanǵan edi. Taraptar atysty toqtatý máselesin, Lıvannyń ońtústigindegi jaǵdaıdy jáne «Hezbollany» qarýsyzdandyrý máselesin talqylady.
Degenmen Izraıl atysty toqtatý rejımine qaramastan Lıvanǵa shabýyldy údetkeni belgili boldy.
Lıvan aýmaǵyna jasalǵan Izraıl shabýyldary saldarynan bir kúnde keminde 39 adam qaza tapty.
Lıvan Densaýlyq saqtaý mınıstrliginiń jańartylǵan málimetine sáıkes, Izraıl armııasynyń 2 naýryzdan beri júrgizip jatqan shabýyldary saldarynan qaza tapqandar sany 2 759 adamǵa jýyqtady.
