Izraıl men Iran arasyndaǵy shıelenis: Túrkııa reıster baǵytyn ózgertti
ASTANA. KAZINFORM — Izraıldiń Iranǵa soqqysynan keıin Túrkııa qaýipti aımaqtardy aınalyp ótetin jańa ushý baǵyttaryn engizdi, dep jazady Anadoly.
Izraıldiń Iranǵa jasaǵan áýe soqqylarynan keıin túrik áýe kompanııalary qaýipsizdik maqsatynda tıisti saqtyq sharalaryn qabyldady, atap aıtqanda ushý baǵyttary qaýipti aımaqtardy aınalyp ótý úshin qaıta retteldi. Bul týraly Túrkııanyń kólik jáne ınfraqurylym mınıstri Abdýlkadır Ýraloǵlý áleýmettik jelide habarlady.
Mınıstrdiń málimdeýinshe, Izraıl, Iran, Sırııa jáne Iraktyń áýe keńistigi Izraıldiń jasaǵan soqqylary men aımaqtaǵy qaýipsizdikke tóngen qaterdiń artýyna baılanysty ýaqytsha jabyldy.
Mınıstr naqtylap ótkendeı, Izraıl, Tegeran jáne Baǵdad ústindegi áýe keńistikteri arnaıy jarııalanǵan habarlamalar (NOTAM) aıasynda jabylady.
— Oqıǵalardyń damýyna baılanysty bizdiń Azamattyq avıatsııa bas basqarmamyz jáne tıisti áýe kompanııalary barlyq qajetti sharany qabyldady. Ushý baǵyttary qaýipti aımaqtardan aınalyp ótetindeı qaıta josparlandy. Jolaýshylar men ekıpajdyń qaýipsizdigi – basty basymdyq. Daǵdarys shtabynyń jumysy jalǵasyp jatyr. Turkish Airlines bastaǵan áýe kompanııalary 16 maýsym, dúısenbige deıin Iran, Irak, Sırııa jáne Iordanııa baǵytyndaǵy reısterin toqtatty, — dedi mınıstr.
Eske salaıyq, jumaǵa qaraǵan túni Izraıl Iran aýmaǵyna jappaı soqqy jasady. Bul shabýyldyń saldarynan Islam revolıýtsııasy saqshylar korpýsynyń (KSIR) birqatar joǵary laýazymdy komandırleri men ıadrolyq fızıka salasyndaǵy ǵalymdar qaza tapty. Iran sondaı-aq Natanz qalasyndaǵy ıadrolyq nysannyń zaqymdanǵanyn rastady, biraq radıatsııanyń taralý faktisin joqqa shyǵardy.
Sondaı-aq Iran Izraılge zymyran atyp, elde áýe dabyly jarııalanǵanyn jazǵanbyz.
Keıinnen Irannyń zymyran shabýylynan 21 adam zardap shekkeni belgili boldy.
Buǵan deıin Qazaqstan Taıaý Shyǵys elderine áýe keńistigin japqany anyqtaldy.