Izraıl men «Hezbolla» soǵysynyń jańa oshaǵy: Álı ál-Taher jotasy nesimen mańyzdy
ASTANA. KAZINFORM – Lıvannyń ońtústigindegi Álı ál-Taher jotasy Izraıl men «Hezbolla» arasyndaǵy soǵystyń negizgi shaıqas alańdarynyń birine aınaldy, dep habarlaıdy Reuters agenttigi.
Izraıl shekarasynan shamamen 15 shaqyrym jerde ornalasqan jota Lıvannyń ońtústik-shyǵysyndaǵy úlken aýmaqty baqylaýǵa múmkindik beredi. Izraıl 2000 jyly aıaqtalǵan Lıvannyń ońtústigindegi 22 jyldyq okkýpatsııasy kezinde de bul aýmaqty baqylaýda ustaǵan.
2 naýryzda qazirgi soǵys bastalǵannan keıin Izraıl áskeri Lıvannyń ońtústigine tereńdeı enip, Álı ál-Taherge aparatyn baǵyttaǵy strategııalyq bıiktikterdi basyp aldy. Maýsymda Izraıl áskeri bul jotany negizgi operatsııalyq nysandarynyń biri dep atady.
Lıvandyq qaýipsizdik derekkózderiniń málimetinshe, «Hezbolla» jota astynda jerasty komandalyq ortalyǵy men qarý-jaraq qoımalaryn salǵan bolýy múmkin. Teńiz deńgeıinen 600 metr bıiktikte ornalasýy bul aýmaqtan Izraıldiń soltústigine qysqa qashyqtyqtaǵy zymyrandar men drondar ushyrýǵa múmkindik beredi.
Sońǵy aılarda Izraıl avıatsııasy jotaǵa birneshe ret soqqy jasady. Maýsymda osy aýmaqtaǵy iri jerasty nysanyn basyp alý operatsııasy kezinde bir ızraıldik sarbaz qaza taýyp, 13-i jaralanǵan. Al «Hezbolla» jotany áli de tolyq baqylaýda ustap otyrǵanyn málimdedi.
Álı ál-Taherdiń saıası mańyzy da artyp keledi. AQSh usynǵan jospar boıynsha Izraıl áskeri Lıvannyń ońtústiginen birtindep shyǵarylyp, Lıvan áskeri «Hezbollany» qarýsyzdandyrýy tıis edi. Alaıda «Hezbolla» qarýyn tapsyrýdan bas tartyp, Izraıl de bul talap oryndalmaıynsha áskerin shyǵarmaıtynyn málimdegen soń, jospar toqyraýǵa ushyrady.
Sarapshylardyń pikirinshe, qazanda ótetin Izraıldegi saılaý qarsańynda Álı ál-Taherdi basyp alý Bınıamın Netanıahý úkimeti úshin mańyzdy áskerı-saıası jeńis bolar edi. Degenmen Izraıl áskeri adam shyǵynyn boldyrmaý úshin jotaǵa tikeleı shabýyl jasaýdan góri ony uzaq ýaqyt qorshaýda ustaý taktıkasyn tańdaýy múmkin.
Eske sala ketsek, Lıvan men Izraıl arasyndaǵy kelissózder qyrkúıekke josparlanǵanyn jazdyq.
Al Lıvanda 860 myńǵa jýyq turǵyn májbúrli qonys aýdarýdan keıin úılerine oraldy.
