Izraıl men HAMAS arasyndaǵy kelissózder sátsiz aıaqtaldy
ASTANA. Kazinform – Kaırde Izraıl men HAMAS arasynda Gaza sektoryndaǵy atysty toqtatý týraly kelissózder sátsiz aıaqtaldy. Bul týraly búgin, 26 tamyzda Mysyrdyń barlaý qyzmetterindegi derekkózderge silteme jasap, «Reýters» agenttigi habarlady, dep jazady DW.
Habarǵa sáıkes, keshe, 25 tamyzda Mysyr astanasynda ótken kelissózderde Izraıl men HAMAS medıatorlar usynǵan barlyq ymyrashyl sheshimderden bas tartqan.
Sonymen birge, amerıkalyq joǵary laýazymdy sheneýnik kelissózder konstrýktıvti ótkenin, taraptardyń «túpkilikti jáne shynaıy kelisimge» kelýge umtylysyn kórsetkenin aıtty. Sondaı-aq, ol qalǵan máselelerdi sheshý jumystary aldaǵy kúnderi jalǵasatynyn, jumys toptary Kaırde qalatynyn aıtty.
Izraıl men HAMAS arasyndaǵy atysty toqtatý jáne kepilge alynǵandardy bosatý týraly kelissózder TsRÝ dırektory Ýılıam Berns, Katar premer-mınıstri Muhammed ben Abdýlrahman Ál Tanı jáne Mysyrdyń joǵary laýazymdy sheneýnikteriniń qatysýymen ótti.
Kelissózder sátsiz aıaqtaldy degen aqparat taraǵan kezde AQSh qorǵanys mınıstri Lloıd Ostın aımaqtaǵy eki áýe kemesindegi soqqy berý tobynyń bolý merzimin uzartýǵa buıryq berdi. Ol óz sheshimin Izraıl qorǵanys mınıstri Ioav Galantpen telefon arqyly sóılesken kezde málimdedi.
– Mınıstr Izraıldiń ózin-ózi qorǵaý quqyǵyn rastady jáne AQSh-tyń Iran men onyń aımaqtyq odaqtastaryna qarsy qorǵanysyn qoldady. Osy qoldaýdyń bir bóligi retinde ol aımaqta eki tasymaldaýshy-ereýil tobyn qaldyrýǵa buıryq berdi, – delingen Pentagonnyń málimdemesinde.
