Izraıl men HAMAS arasyndaǵy qaqtyǵysta eki jaqtan 2,3 myń adam kóz jumdy

Sońǵy birneshe saǵat ishinde Izraıldiń Gaza sektoryndaǵy áýe shabýyldary saldarynan 51 palestınalyq qaza taýyp, 281-i jaralandy. Bul týraly Gaza Densaýlyq saqtaý mınıstrligi habar taratty, dep habarlaıdy Kazinform agenttigi VVS jańalyqtaryna silteme jasap.

Buǵan deıin Palestına jaǵynda mert bolǵandar sany 1100-den asqany habarlanǵan bolatyn.

Izraılde HAMAS shabýylynan keminde 1200 adam qaza tapty.

Buǵan deıin AQSh, Izraıl, BUU jáne Mysyr Gazaǵa kómek jetkizý jáne turǵyndardyń bir bóligin bosatý jóninde kelissóz júrgizip jatqany habarlanǵan bolatyn.

Biraq qazirgi ýaqytta Gazada bir de bir baqylaý-ótkizý pýnkti jumys istemeı tur.

Senbi kúngi HAMAS shabýylynan keıin Izraılmen shekaradaǵy barlyq baqylaý-ótkizý beketteri jabyldy.

Kúni keshege deıin Gaza men Mysyr arasyndaǵy «Rafah» baqylaý beketi jumys istep turdy.

Ol jeksenbi kúni júk tasymaly úshin ashyldy. BUU málimeti boıynsha, azyq-túlik, janar-jaǵarmaı jáne qurylys materıaldary tıelgen 200-ge jýyq júk kóligi ótken.

Ol arqyly táýligine júzdegen adam óte alady. Olardyń bári áýeli ruqsat alýy kerek.

BUU málimetinshe, dúısenbi kúni Gaza sektorynan 800-ge jýyq adam shyǵyp, 500-ge jýyq adam onyń aýmaǵyna kirgen.

Gaza sheneýnikteri men mysyrlyq derekkózder Reuters agenttigine habarlaǵandaı, sodan keıin baqylaý-ótkizý pýnktine áýe shabýyldary jasalǵan.

Oqıǵa ornynan túsirilgen kadrlardan Mysyrǵa qaıtyp bara jatqan júk kólikteri kórinedi.

Sodan beri atalǵan baqylaý-ótkizý pýnkti jabyldy.