Izraıl men HAMAS arasyndaǵy bitim qashan bastalady
ASTANA. KAZINFORM – AQSh prezıdenti Donald Tramp 9 qazanǵa qaraǵan túni Izraıl men HAMAS-tyń Mysyrda beıbitshilik josparynyń birinshi kezeńin keliskeni týraly málimdedi. Izraıl men Gaza sektorynda qazir bolyp jatqan oqıǵalar týraly Kazinform menshikti tilshisiniń materıalynan oqyńyz.
AQSh prezıdenti Donald Tramptyń Gaza sektory boıynsha josparynyń birinshi kezeńi týraly kelisimge qol qoıý Izraıl ýaqytymen saǵat 12:00-de (Astana ýaqyty boıynsha 14:00) Mysyrdyń Sharm-el-Sheıh kýrortynda ótedi dep kútilip otyr.
Kelisimge qol qoıylǵannan keıin Gaza sektory aýmaǵynda atysty toqtatý kelisimi kúshine enedi.
Kelisimge sáıkes Izraıl kúshteri óz áskerin Rafah baqylaý-ótkizý beketi jáne onyń tóńireginen shyǵarady. Kelisimde palestınalyq naýqastar men jaraqat alǵandardy emdeý úshin Mysyrǵa tasymaldaýǵa bolatyny aıtylǵan, al Rafah baqylaý-ótkizý beketi eki baǵytta ashyq bolady.
Atysty toqtatý sharasynyń alǵashqy bes kúninde Gaza sektoryna kún saıyn gýmanıtarlyq júk tıelgen keminde 400 kólik kiredi, keıingi kúnderi bul san artady.
Kelisimde sondaı-aq qonys aýdarǵan adamdardy anklavtyń ońtústiginen Gaza qalasy men soltústigine dereý qaıtarý sharasy qarastyrylǵan.
HAMAS-tyń joǵary laýazymdy sheneýnigi AFP-ge Izraıldiń kepilge alynǵan 20 tiri adamǵa aıyrbas retinde shamamen 2 myń palestınalyq tutqyndy bosatatynyn habarlady. Olardyń arasynda ómir boıyna bas bostandyǵynan aıyrylǵan 250 adam jáne soǵys bastalǵaly ustalǵan taǵy 1700 adam bar.
Izraıl kabınetiniń otyrysy
Budan basqa, beısenbi kúni keshke Izraıl úkimetiniń otyrysy ótip, onda kelisim maquldanýy tıis.
Izraıl aqparat quraldarynyń habarlaýynsha, Izraıldiń áskerı-saıası kabıneti saǵat 17.00-de Gaza sektoryndaǵy atysty toqtatý kelisimi týraly esepti tyńdaýy úshin jınalady. Sodan keıin Izraıl úkimetiniń tolyq quramy kelisim boıynsha daýys berýge keledi.
Al-Arabiya habarlaýynsha, HAMAS kepilge alynǵandardy qaýipsiz jerlerge tasymaldaýdy bastap ketti, kelisim aıasynda olardy jaqyn kúnderi tapsyrýǵa daıyndalyp jatyr. Bir ýaqytta tiri qalǵan 20-ǵa jýyq kepilgen alynǵan adam bosatylady, biraq olar Gazanyń soltústigi men ortalyǵyndaǵy ártúrli jerlerde otyrǵany shamalanyp otyr.
Kepilge alynǵandar qashan bosatylady
AQSh prezıdenti Donald Tramp Fox News arnasynyń «Hannity» baǵdarlamasynda Gaza sektorynda otyrǵan kepilge alynǵandar bosatylyp, kepilge alynǵan soń qaza bolǵandardyń deneleri dúısenbi kúni jiberilýi múmkin ekenin málimdedi.
Izraıldiń AQSh-taǵy elshisi Iehıel Leıter CNN-ge HAMAS ustap otyrǵan kepilgen alynǵan tiri azamattar jeksenbi nemese dúısenbi kúni bosatylatynyn habarlady.
Tramp Izraılge ushyp kelýi múmkin
Izraıldik BAQ-tyń habarlaýynsha, Izraıl premer-mınıstri Bınıamın Netanıahý AQSh prezıdenti Donald Tramppen telefon arqyly áńgimelesti jáne Amerıka prezıdentin Knessette sóz sóıleýge shaqyrdy.
TsAHAL Gazadan áskerin shyǵarýǵa daıyndalyp jatyr
Izraıl qorǵanys armııasy atysty toqtatý kelisimin quptap, HAMAS-pen kepilge alý men atysty toqtatý kelisiminiń bir bóligi retinde Gaza sektorynan ishinara shyǵýǵa daıyndyq bastalǵanyn jarııalady.
Áskerıler málimdemesinde «TsAHAL saıası basshylyqtyń dırektıvalaryna jáne jaǵdaıǵa bergen baǵasyna sáıkes kelisimdi júzege asyrý úshin jedel daıyndyqty bastady» delingen.
TsAHAL málimdeýinshe, osy daıyndyq aıasynda ol áskeriniń «jaqyn bolashaqta ózgertilgen ornalastyrý jelilerine» qaıta ornalastyrýǵa daıyndalyp jatyr. TsAHAL Bas shtabynyń basshysy Eııal Zamır áskerlerge kez kelgen stsenarııge daıyn bolýdy buıyrdy, óıtkeni áskerıler kelisim aıasynda kepilge alynǵandardy qaıtarýǵa jáne Gaza sektorynan ishinara shyǵýǵa daıyndalyp jatyr.
Gaza sektory jáne Izraıldegi merekeleý
Osy arada Gaza sektorynan Han-ıÝnıs pen Gazanyń ortalyq bóligindegi kóshelerinde adamdardyń bı bılep, án salyp, atysty toqtatý kelisiminiń jarııalanǵanyn toılap júrgeni túsirilgen beınejazbalar kelip jatyr.
Izraıldik kepilge alynǵandardyń otbasylary men olardyń jaqtastary Tel-Avıvtegi «Kepilge alynǵandar alańyna» jınalyp, barlyq tutqyndardy birneshe kún ishinde úılerine qaıtarady dep kútilgen kelisimniń aıaqtalýyn toılap júr.
Buǵan deıin Izraıl men HAMAS beıbitshilik josparynyń birinshi kezeńi boıynsha kelisimderge qol qoıǵanyn habarlaǵan bolatynbyz.