Izraıl men HAMAS arasyndaǵy atysty toqtatý týraly kelisim 90% daıyn — AQSh

ASTANA. KAZINFORM — Aq úıdiń málimetinshe, Izraıl men HAMAS terrorıstik uıymy arasyndaǵy atysty toqtatý týraly kelisim is júzinde aıaqtalýǵa jaqyn, dep jazady BILD.

BILD Telegram arnasynyń habarlaýynsha, Amerıka úkimetiniń joǵary laýazymdy ókilderiniń biri kelisimderdiń daıyn bolǵany týraly habarlaǵan.

— Kelisimde barlyǵy 18 tarmaq bar, onyń 14-i aıaqtaldy, — dedi ol.

Onyń aıtýynsha, ızraıldik kepilge alynǵandar men palestınalyq tutqyndardy aıyrbastaý sharttary, sondaı-aq Izraıl áskerleriniń Gaza sektorynan shyǵarylýyna qatysty máseleler áli sheshilmegen.

Izraıl túrmelerinde jazasyn ótep jatqan birneshe júz palestınalyq tutqyn ótken jyldyń 7 qazanyndaǵy basyp alý kezinde sodyrlar kepilge alǵandardyń ornyna bosatylady.

— Kepilge alynǵan árbir adam úshin belgili bir palestınalyq tutqyn bosatylady, — dedi Amerıka úkimetiniń ókili.

BUU Qaýipsizdik keńesi Gaza sektoryndaǵy atysty toqtatýǵa taǵy da shaqyrdy.

— Biz qalǵan kepilge alynǵandardy qutqarýdyń jáne palestınalyq beıbit turǵyndardyń qaıǵysyn jeńildetýdiń eń jaqsy joly kelissózder arqyly atysty toqtatý ekenin bilemiz, — dedi AQSh-tyń BUU-daǵy elshisi Lında Tomas-Grınfıld.

Onyń Qytaı, Ulybrıtanııa, Frantsııa, Japonııa jáne reseılik áriptesteri de osyndaı málimdeme jasady.

Buǵan deıin dúısenbi kúni Izraılde jappaı ereýil bastalǵan bolatyn. 

Júz myńdaǵan adam Gaza sektoryndaǵy palestınalyq HAMAS tobymen atysty toqtatý kelisimin talap etti.